Luzakuba luqilima ukhuseleko lwamapolisa xa kudlala umdlalo wamagqibela kankqoyi wetumente yeNedbank, ozakuba phakathi kwe Kaizer Chiefs kwakunye ne Orlando Pirates, kwibala lase Moses Mabhida, eThekwini kwiphondo laKwaZulu Natal, namhlanje. Oku kulandela izigrogriso ezenziwe kumakhasi onxibelelwano, nezithi abathandi bebhola bazakungena ngenkani ebaleni, kulandela ukubakho kwamagingxi-ginxi okuthengiswa kwamatikiti. Iziphatha mandla ze Premier Soccer Leauge, zixolisile ngemingeni eyenzekileyo ebutsheni baleveki, nedalwe ngumthamo ophezulu wokufunwa kwamatikiti.