Melodie skryf ‘n brief aan haar ouers waarin sy vertel van haar ontmoeting met Anja, Bas, Wouter, Dimmi, Aria, Harmonie en Zingflits. Sy dink met heimwee terug aan al die gevare wat daar was, en ook aan al die planne wat beraam is met die hulp van die instrument-families. Sy besef dat musiek altyd deel van haar menswees sal wees. Tannie Tuba, Piccolo, Madame Klarinet, Koning Mantel en Simfonie die Olifant sal lank in Melodie se hart woon.

Liedjiedorp 3 Januarie 2025

Ons vind uit hoekom Zingflits sekere keuses gemaak het, en ons verstaan uiteindelik wat die kern van die probleem is. Melodie wys dat 'n sagte stem altyd die grimmigheid tem!

Liedjiedorp 27 Desember 2024

Melodie gebruik die krag van musiek, en stel ‘n voorbeeld van hoe om dapper te wees. Luister hoe Harmonie een van die grootste geheime van die musiekwêreld met ons deel. Liedjiedorp word uiteindelik Liedjiedorp!

Liedjiedorp 20 Desember 2024

Aria en Bas word wakker nadat die slaapkruie van Zingflits uitgewerk het, en sien hoe musiek al die mense, instrumente en diere bymekaar bring. Selfs die xilofone word daaraan herinner dat hulle ook melodie kan voortbring!

Liedjiedorp 13 Desember 2024

Anja en Tannie Tuba deel ‘n spesiale oomblik. Die waterspel met die krane word 'n mooi metafoor om ons te leer hoe die koperblaasfamilie ook “water” in hulle pype het, en mooi skoongemaak moet word. Melodie stel vir Koning Mantel, die leeu, aan Anja voor. So ontstaan die wonderlike idee om met ‘n wals vir Zingflits 'n ding of twee te wys! Het jy geweet dat van die bekendste walse deur die Johann Strauss gekomponeer is? Komponiste soos Schubert, Chopin, Liszt en Brahms het die wals verder gewild gemaak. Tsjaikofski het ook pragtige walse vir ballet gekomponeer. As jy na 'n Boeredanswals wil luister, gaan soek die Bredell Dansorkes op, en luister na hulle interpretasie van die Loeriewals.

Liedjiedorp 6 Desember 2024

Luister na alles wat Melodie, Harmonie, Aria wn Zingflits sê, en dan kom die slimste en oudste dier van Liedjiedorp ook nog na vore: `n Olifant met die naam Simfonie. Soveel Variasie kom in hierdie episode. Dit is tyd vir verandering, uiteindelik, ten goede!

Liedjiedorp 29 November 2024

Melodie ontmoet vir Harmonie, die vorige burgemeester van Liedjiedorp. Die kat, Klawertjie, lei vir Melodie uit die grot uit, en skielik gebeur iets baie spesiaal! Wie sluit by hulle aan? Het jy geweet dat jy dikwels aan die begin of aan die einde van 'n komposisie unisoon-klanke hoor? Sodoende word meer gewig verleen aan die besondere melodie. Eine Kleine Nachtmusik van Mozart en die Vyfde Simfonie van Beethoven begin byvoorbeeld in unisoon.

Liedjiedorp 22 November 2024

Anja en Wouter leer ken die wonderlike Tannie Tuba. Wie is die Koperblaas-familie, en hoe sal hulle vir Anja-hulle kan help? Het jy geweet dat `n tuba drie tot selfs vyf ventiele het? Die tregter wys altyd boontoe as jy dit speel. ‘n Sousafoon is `n spesiale bastuba, wat van veselglas gemaak is, sodat jy dit maklik om jou lyf kan hang. Sousafone word in veral militêre orkeste gebruik. Luister na R. Vaughan Williams se Bastubakonsert in F-Mineur.

Liedjiedorp 15 November 2024

Bas en Aria ontdek die simboliek van die gebruik van sleutels in musiek. Verder ontdek hulle hoe alledaagse sleutels nodig is om planne te maak sodat hulle oplossings kan oopsluit. Zingflits steek ‘n stokkie voor hulle planne, en ons vind uit hoekom hy ŉ nare simbaal geword het! Sal Bas en Aria dalk hierdie keer vir Zingflits kan stuit? Het jy geweet dat die G- sleutel, ook genoem diskantsleutel, na die noot, G, wys wat op die tweede lyn van die notebalk is? Die bassleutel of F-sleutel wys die noot, F, aan wat op die vierde lyn van die notebalk voorkom. Jy kan al die note uitwerk wat verder volg op hierdie manier. Tel altyd die lyne van onder af boontoe op die notebalk. Daar is ook 'n alt-sleutel vir die altviool en 'n tenoorsleutel vir die tromboon, tjello en fagot. Musieksleutels en simbole is die merke wat vanaf die 13de eeu gebruik word in bladmusiek om toonhoogte, ritme en tempo aan te dui. Gaan lees meer oor lyne, sleutels, note, rustekens, toevallige tekens, tydmaattekens en artikulasietekens op UNISA se webwerf met spesifieke aandag: teorie voorskrifte en musieksilabusse.

Liedjiedorp 8 November 2024

Anja, Melodie en Wouter volg vir Piccolo deur die donker grot, terwyl hulle van Zingflits ontsnap. Hulle gebruik die spesiale refrein en mooi wysie van Piccolo, om die pad deur die tonnel te kry. Hulle word daaraan herinner dat hulle die krag van musiek werklik in hul eie lewe kan toepas. Het jy geweet dat die woord, koor, ook as `n sinoniem vir die woord, refrein, gebruik kan word? Melodieë bestaan baie keer uit een of meer musikale frase, en kan in verskillende vorme deur die hele musiekstuk herhaal word. Klassieke komponiste gebruik dikwels 'n spesifieke melodiese tema meer as een keer, en herhaal dit deur die skep van variasies. Populêre musikante wat volksmusiek komponeer en wat teks ook insluit, gebruik een of twee melodieë, en gebruik dit dan oor en oor, en word vers en refrein dan duidelik gehoor. Luister na Bok van Blerk se gebruik van die refrein in sy lied, De la Rey.

Liedjiedorp 1 November 2024

'n Gedramatiseerde musiekstorie wat groot en klein se verbeelding sal aangryp met die avonture van Bas, Melodie, Harmonie, Aria, Anja en Wouter. Musiekopvoedkundige elemente word in elke episode op 'n unieke manier geïnkorporeer deurdat elke letter van die alfabet ook deel is van die tematiese gebruik en uiteensetting van die pragtige musiekstorie. Daar is ritme, melodie, tempo, toonkleur, tekstuur, vorm en dinamiek. Ons leer ken die vier instrumentfamilies van die orkes, en verskeie ander musiekterme wat integraal deel vorm van die hartklop van musiek. Die skrywer en regisseur is Luan Jacobs.

<p>'n Gedramatiseerde musiekstorie wat groot en klein se verbeelding sal aangryp met die avonture van Bas, Melodie, Harmonie, Aria, Anja en Wouter. Musiekopvoedkundige elemente word in elke episode op 'n unieke manier geïnkorporeer deurdat elke letter van die alfabet ook deel is van die tematiese gebruik en uiteensetting van die pragtige musiekstorie. Daar is ritme, melodie, tempo, toonkleur, tekstuur, vorm en dinamiek. Ons leer ken die vier instrumentfamilies van die orkes, en verskeie ander musiekterme wat integraal deel vorm van die hartklop van musiek. Die skrywer en regisseur is Luan Jacobs.</p>

Liedjiedorp

Social links:

27 clip(s)