Elke weeksmiddag hoor jy hom skerp vrae vra in RSG Geldsake met Moneyweb. Ryk van Niekerk is onlangs bekroon met die Sanlam Sakejoernalis van die jaar-toekenning. Hy het land en sand met Pieter Steyn gesels oor die liefdesverhale wat hy onder 'n skuilnaam vir vrouetydskrifte geskryf het, van die groot bedrogspulle wat hy oopgevlek het, en oor sy pa, die oudminister van landbou, Kraai van Niekerk.

RSG Bekbasaar: Land en sand - Ryk van Niekerk

Die burgerregte-organisasie, AfriForum, vier in 2026 sy 20ste bestaansjaar. AfriForum en sy leiers het die afgelope twee jaar onder skerp kritiek deurgeloop, onder meer oor hulle besoeke aan Amerika en meningsverskille oor Afrikaans en Afrikaners. Pieter Steyn het land en sand met AfriForum se bestuurshoof, Kallie Kriel, gesels oor hierdie kwessies, sy dae as KP-lid van die studentraad van Tukkies, wat AfriForum doen as hulle nie betrokke is by ideologiese debatte nie, en wat hulle ledetal dryf.

RSG Bekbasaar: Land en Sand - Kallie Kriel

Hy is nie ’n man wat sonder handskoene aangepak moet word nie. Die privaatspeurder en TV- persoonlikheid, Mike Bolhuis, is berug daarvoor dat hy nie doekies omdraai nie. Ook nie in sy eerste boek met die stories van valskermsoldate wat onlangs vrygestel is nie. Mike het op sy kleinhoewe buite Pretoria, land en sand met Pieter Steyn gesels oor sy geloof, sy swakheid vir parfuum, en van die berugte mense wat hy al ondersoek het – van advokaat Barbie en Dirk Prinsloo tot Louis Liebenberg.

RSG Bekbasaar: Land en Sand - Mike Bolhuis

Petrus Vaalbooi, die man wat in Dawid Kruiper se ikoniese voetspore volg as leier van die San-raad van Suid-Afrika, dra ’n swaar erfenis op sy skouers. Hy is bekommerd oor die wankelrige toekoms van sy moedertaal, Nxu. Petrus het tussen die rooi Kalahari-duine, naby die Namibië-grens, land en sand met Pieter Steyn gepraat. Hy vertel waarom hy die naam Boesman bo San verkies. Hy verduidelik ook hoe die jakkalsaltaar werk, ’n ritueel waar ’n paartjie by mekaar vlerksleep en uiteindelik trou.

Land en sand: Petrus Vaalbooi

Hy was ’n sakeleier wat deur die destydse Financial Mail-redakeur, Barney Mthombothi, as ’n fontein van kennis en menslikheid beskryf is. Hy het ’n reuse rol gespeel om Toyota in Suid-Afrika die markleier in voertuigverkope te maak. Brand Pretorius se passie is leierskap en mense. Hy het land en sand met Pieter Steyn gesels oor sy suksesse by Toyota, hoe hy bankrot McCarthy-maatskappe met miljarde rande se skuld omgedraai het, en hoe sykouse hom uit ’n penarie gered het.

Land en sand: Brand Pretorius

Hy was eens 'n vurige ondersteuner van die ANC, het later die brug na die DA oorgesteek, en die laaste paar jaar het hy sy eie politieke party, Action SA. Herman Mashaba is 'n multimiljoenêr-sakeman, wat sedert hy die politiek betree het, gereeld sy oponente die harnas injaag. Herman het land en sand met Pieter Steyn gesels in sy huis in Johannesburg oor sy grootwordjare toe sy ouer susters hom groot gemaak het, sy ma wat skelm saans vir hulle in Hammanskraal kom kuier het, die verbysterende sukses van sy maatskappy, Black Like Me, en hoekom hy saam met die ANC werk, al het hy gesê hy sal nooit weer nie. Hy speel ook 'n stukkie klavier.

Land en sand: Herman Mashaba

In 1975, vanjaar 50 jaar gelede, was daar vir die eerste keer televisieuitsendings in Suid-Afrika, hoewel dit nog toetsuitsendings was. Die legendariese uitsaaier en joernalis, Freek Robinson, het in 1975 by SAUK-TV begin werk. Freek het land en sand met Pieter Steyn gesels oor sy liefde vir vis-skiet in die see, die debat tussen Nelson Mandela en FW de Klerk waarna 800 miljoen mense gekyk het, die dag toe hy amper sy lewe verloor het in Soweto, en vele ander groot nuusgebeure waarvan hy 'n getuie was. Ook sy dae as aanbieder van Praat Saam op RSG.

Land en sand: Freek Robinson

Hy is nie bang om op te tree waar daar onreg en onregverdigheid plaasvind nie. Die voormalige Konstitusionele hof-regter, Edwin Cameron, was eers 'n menseregte-advokaat, voor hy aangestel is as regter. Deesdae is hy die inspekterende regter vir tronke. Hy het land en sand by sy huis in Joghannesburg met Pieter Steyn gesels oor sy grootworddae in 'n kinderhuis, sy pa wat in die tronk was, van sy groot hofsake, die stigma aan gay-wees, hoe hy al byna 40 jaar met Vigs lewe, hoekom Thabo Mbeki Vigs aan ras gelyk gestel het, en oor die Wilgenhof-drama op Stellenbosch.

Land en Sand: Edwin Cameron

Met meer as 26 000 moorde per jaar in Suid-Afrika, is dit een van die geweldadigste lande in die wêreld. Ds. Gerhard Pietersen se skoonouers is in 2016 wreed in 'n plaasaanval by Groot-Brakrivier vermoor. Sy boek oor die gebeure en wat daarna gebeur het, WOND, het pas verskyn. Gerhard het land en sand met Pieter Steyn gesels oor die moorde, die ontredderdheid en trauma vir die mense wat agterbly, die verpolitisering van veral plaasmoorde, en hoe 'n wond langsaam genees.

Land en Sand: Gerhard Pietersen

Die CIA, MI-5, MI-6, Mossad, Shin Bet... Die mensdon se fassinasie met spioene en spioenasiewerk ken byna geen einde nie. DIE BURO, ’n boek deur die intelligensie-historikus, Henning van Aswegen, het pas verskyn. Hy kyk na die geskiedenis van Suid-Afrika se intelligensiediens in die 1960’s en 70’s, toe dit as die Buro vir Staatsveiligheid bekend gestaan het. Henning het land en sand met Pieter Steyn gesels oor onder meer generaal Lang Hendrik van den Berg.

Land en sand: Henning van Aswegen

Elke week gesels Pieter Steyn land en sand met planmakers, bekendes en berugtes. Dis 'n in-diepte, maar informele gesprek sonder enige heilige koeie of taboes.

<p>Elke week gesels Pieter Steyn&nbsp;<em>land en sand </em>met planmakers, bekendes en berugtes. Dis 'n in-diepte, maar informele gesprek sonder enige heilige koeie of taboes.</p>

Land en Sand

Social links:

79 clip(s)