Ikomishoni yamalungelo oluntu eMzantsi Afrika igxeke kabukhali umanejala nosodolophu bomasipala iMakana eMpuma Koloni, ngokungahloniphi nokungahoyi izindululo zale komishoni malunga nokuhanjiswa kweenkonzo ezingundoqo eMakhanda naseAlicedale. Le komishoni ibiphulaphule ingxelo yenkqubela kamasipala ngezikhalazo zabahlali ngamanzi nogutyulo, nabathi bahlala iiveki neenyanga bengenamanzi. Le komishoni ityhola ngelithi abaphathi bomasipala waseMakana basilele ukunika ingxelo ebambekayo nenamaxesha abekiweyo okulungisa ingxaki eseyisondele kwisithuba sonyaka, emva kokubonisana nalo masipala ngokunyhashwa kwamalungelo oluntu kubonelelo lwamanzi nogutyulo.