Igqiza labathathi nxaxheba kwingqungquthela ebisingethwe ngumbutho wezonxibelelwano ogxile kwezemfundo, ukuphuhliswa kolutsha kwakunye noqeqesho lwezakhono, i-Inside Education, limemela ukulungelelaniswa kwemfundo kuwo onke amacandelo kwakunye nezakhono ezidingekayo. Lombutho ubusingethe ingqungquthela kazwelonke yezemfundo, iNational Education Summit, nalapho bekudibene iinkokheli zikarhulumente, amacandelo ohlukileyo, izifundiswa, abaqulunqi bomthetho kwakunye nemibutho yoluntu, phantsi komxholo othi "Fixing the Education Pipeline: From Early Childhood to Transformative Livehoods". Kwezinye zezinto lengqungquthela ebigxile kuzo, singabalula ukuqiniswa kokulungelelaniswa kweenkqubo zemfundo,  ukuqala kuphuhliso lwabantwana abaselula ukuya kwingqesho kwakunnye nezoshishino, kwilinge lokuqubisana nemingeni eqhubekayo enxulumene nokungaqeshwa kolutsha kwakunye nokungahambelani kwezakhono neenkqubo ezikhoyo.  Bethetha kule ngqungquthela abathathi nxaxheba bagxininise into yokuba nangona uMzantsi Afrika wenze inkqubela phambili yokufikeleleka kwezemfundo, kodwa kuninzi okudinga ingqwalasela ekuphuculeni umgangatho ohambelana neziphumo ezidingekayo kwingqesho.