Isebe lesipolisa liphulukana nemali eninzi ngenxa yokuhlawula amabango okubanjwa kwabantu bagcinwe eluvalelweni, ngokungekho mthethweni. Le mali ihlawulwa kubantu ekuye kufumaniseke ukuba babanjwe ze bagcinwa eluvalelweni ngokungekho mthethweni,  iqikelelwa kumyinge wamashumi amane anesibini ekhulwini, kulwawibo mali lwesebe oluyi R133 yeebhiliyoni zeerandi, kunyaka mali ka 2025/2026. Ngokwengxelo kamphathiswa obambeleyo kwisebe lesipolisa uFiroz Cachalia, ukubanjwa kwabantu ngokungekho mthethweni kutyabule isebe lesipolisa imali engaphaya kwe R620 yezigidi zeerandi kunyaka mali ka 2024/2025. Iingxelo zithi xa kungoku, phantse ibe ngamabango anxulumene noku angamawaka angamashumi amane anethoba angekahlawulwa, nto leyo eshiya elisebe lijongene namatyala ekufuneka ebhatelwe afikelela kwimali eyi R56.7 yeebhiliyoni zeerandi. Kwiminyaka emithathu egqithileyo, iziganeko zokubanjwa kwabantu ngokungekho mthethweni zonyukile ukusuka kumawaka amane anamakhulu amahlanu anesine nesixhenxe kunyaka mali u2022/2023 aya kutsho kumawaka amahlanu anamakhulu amahlanu namashumi amabini anesixhenxe kunyaka mali ka 2023/2024.