Iinkokheli zemveli zivakalise inkxalabo ngokungaxhaswa nguRhulumente ngokwemeko eziphila ngayo, nasekwenzeni umsebenzi wazo. Oku kuvezwe kwingqungquthela entsuku-mbini yobunkokheli bemveli nohlanga lwamaKhoisan, i-Eastern Cape Traditional Leaders' Summit, ebanjwe lisebe lemicimbi yemveli kuGompo, kwiphondo iMpuma Koloni. Ezi nkokheli zithi kuseliqela okudinga ukwenziwa ukuncedisana nazo, ukuze zibenokuxhasa ngokupheleleyo abo zibakhokeleyo; zilumkisa ngelithi ukusilela ukuqubisana ngokufanelekileyo nemingeni ejamelene nazo nokuzixhasa ngokugqibeleleyo, kuchaphazela kakubi uzinzo kuluntu ekuhlaleni. Ukanti ngethuba esenza intetho engobume bephondo kwinyanga ephelileyo, iNkuluBaphathiswa yephondo leMpuma Koloni uOscar Mabuyane, yaphawula ngokubaluleka kwentsebenziswano phakathi kukaRhulumente neenkokheli zemveli kuphuhliso lweliphondo, nalapho yabhengeza izicwangciso zokuzixhasa nangakumbi kumsebenzi wazo.
Ukuqwalasela banzi okuvele kulengqungquthela nezindululo, emnxebeni sincokola noMphathiswa ojongene nemicimbi yemveli eMpuma Koloni, uZolile Williams.