Idale ukubethana kwezimvo, intetho yolwabiwo mali yomphathiswa uEnoch Godongwana, ayenze emva kwemini namhlanje. Phakathi kwezinto azibalule ngethuba esenza le ntetho, kukonyuswa kwezibonelelo zikarhulumente, kuquka umtyhi kwirhafu etsalwa kwimivuzo yabasebenzi, nohlumo loqoqosho, oluthelekelelwa kumyinge ka-1.6% ku2026. UMphathiswa uGodongwana ukwazobe umfanekiso oncumisayo ngemeko yoqoqosho loMzantsi Afrika, nathi lubonakalise ukukhula iikota ezine zilandelelana kunyaka ka2025; esithi kulonyaka-mali bagxile ekukhawuleziseni oluhlumo. Uthi uRhulumente uzakugxila kwiintsika ezine ukuqinisekisa oku, eziquka ukuzinzisa imeko yoqoqosho, ikumiliselwa kweenguqu ezizakuqinisekisa ukukhula kwalo, ukutyalwa kwicandelo lezoseko ezingundoqo, nokwakha uRhulumente onesakhono sokumilisela ngempumelelo izicwangciso zophuhliso zelilizwe. Umphathiswa ukwabhengeze neenguqu zokuphucula inkqubo yezamandla yeli, oomasipala, kuquka namaqumrhu oshishino kaRhulumente.