Isebe lezempilo kwiphondo iMpuma Koloni, lithi ukufuduka kwabantu besiya kwezinye izixeko kusengumngeni ukugcina kunyango abo bachaphazeleke yintsholongwane ka gawulayo kweli phondo. Eli phondo liphawule usuku lwehlabathi lentsholongwane ka gawulayo KwaZakhele eGqeberha.  Ngokwengxelo esuka kwisebe, basondele kwikhulu namashumi amane anesibhozo amawaka(148-thousand) abantu abaphila ne HIV, abazaziyo ukuba baphila nayo, abangawatyiyo amachiza okuthomalalisa le ntsholongwane. Isebe lithi liphehlelele amavela tanci amabini amaphulo agxile ekungeneni umzi nomzi ukufikelela kubantu abangawathathiyo amachiza okuthomalalisa i HIV.