Ilizwekazi iAfrika alizokuxhomekeka kuthelekelelo lwamatyala nomgangatho wotyalo mali lwalo, kwii-arhente zangaphandle kuphela. Oku kuza nanjengoko kuphehlelelwe ngokusesikweni i-African Credit Rating Association (ACRA), edibanisa ndawonye ii-arhente zothelekelelo lwamatyala notyalo mali zalapha eAfrika, ngeenjongo zokukhuthaza ukuzimela, ukwenziwa kothelekelelo ngokuphandle, nangengendlela ethembekileyo. Oosoqoqosho ngaphambili baaphakamisa inkxalabo ngokuba ii-arhente zothelekelelo ezisetyenziswa kwihlabathi, eziquka iS&P, iMoody's neFitch, aziluqwalaseli ngendlela efanelekileyo uqoqosho lwe-Afrika, amatyala, nomgangatho wotyalo mali welilizwekazi xa zisenza uhlolo, kuquka nemiba enegalelo kwindlela olutshintsha ngayo uqoqosho lwase-Afrika. Kungokunje, elilizwekazi lijamelene netyala eliphezulu, ukucotha kohlumo loqoqosho nophuhliso, kuquka nemingeni yemontlalo; ubukhulu becala zibangelwa yinkangeleko engakhuthaziyo ngokweziphumo zoluthelekelelo. Kodwa ingaba elinyathelo lizakunceda kusini na ekuguquleni imeko yoqoqosho lweAfrika, xa ngoku kuzakuqiniswa amagunya, intembeko nokusebenza kwee-arhente zalapha ekhaya.