Namhlanje lusuku lokuqala uMzantsi Afrika uqwalasela iphulo leentsuku ezilishumi elinesithandathu elichasene nempathombi ngakumanina kunye nabantwana, nelibizwa i-16 Days of Activism. Ngolwesihlanu kwiveki ephelileyo umongameli uCyril Ramaphosa wenze isibhengezo sokuba impathombi esekelezelwe kwisini yintlekele kazwelonke, emva kwezimelelo kuquka noqhankqalazo kwilizwe jikelele lunyanzelisa oku. Imibutho yoluntu ithi emva kwesisibhengezo kufuneka kubekho isicwangciso esicacileyo, neendlela zokuthintela impathombi. Noxa nje amanye amatshantliziyo ethandabuza ixesha lesisibhengezo, amanye asivuyele.