Ikomishoni kaMadlanga izakugqiba ngoMvulo ngesicelo sika somashishini waseMntla Ntshona uSulliman Carrim, sokuba anike ubungqina kwiseshoni ebanjwe bucala kwaye kungekho shicilelo lwamajelo eendaba. UCarrim ufake isicelo phambi kwale komishoni, ecela ukuba anike ubungqina ekhusini ebalula ukuba ufumana izigrogriso kwaye ubomi bakhe busemngciphekweni. UCarrim uzakunika ubungqina ngoMvulo nangoLwesibini. Lo somashishini ngaphambili uzame ukuthintela ukuba abizelwe phambi kwale komishoni. Nangona kunjalo, ezo nzame ziwe phantsi ngethuba inkundla ephakamileyo isikhupha isicelo sakhe kumatyala amele ukuqwalaselwa yinkundla, nento emnyanzela ukuba anike ubungqina phambi kwale komishoni.