Usosiba jikelele we ANC uFikile Mbalula, uphakamise ukuba kuziwe nesicwangciso selizwekazi i  Afrika esingokungena nokuphuma kwabemi bamanye amazwe nesizakuthiwa taca kwimbumba yamazwe aseAfrika, ngelithi umiliselo mthetho kukodwa akunako ukuqubisana nale nyewe itshis'ibunzi. UMbalula ebethetha neentatheli eLuthuli House namhlanje ngesimo sepolitiki kweli loMzantsi Afrika. Uyiqhwabele izandla inkoliso yabemi beli namapolisa ngokugcina ucwangco nokuthobela umthetho ngomhla wamashumi amathathu kweyeSilimela. Nangona kunjalo, ubalule ukuba izimo zoqoqosho ezingafaniyo ngokwahluka kwamazwe, iimfazwe kunye nezinye iimeko ezibangelwa sisimo sokuguquguquka kwesimo sezulu, zikhokhelele ekubeni uMzantsi Afrika ube likhaya kubantu abasondele kwizigidi ezine zabemi bangaphandle abakweli, ntoleyo efaka uxinzelelo kumaziko empilo, izikolo nezinye iinkonzo abazisebenzisayo.