Zochitika (Chinyanja)

 Sipikala wa nyumba ya malamulo ya mdziko la Malawi Sameer  Suleman wakhazikitsa committee yatsopano yapadela yomwe ichite yakafuku fuku wa ngozi yomwe inapha wachiwiri kwa president Dr Saulos  Chilima  ndi anthu ena asanu ndi atatu ndipo ku committee imeneyi mukhala aphungu oyima pa okha ndi aphungu a zipani za DPP, MCP, UTM ndi UDF . Mtolankhani wa Channel Africa Jayne Chilimampunga wabwela ndi nkhani yonse 

Mtsogoleri wachipani chotsutsa boma cha National Unity Platform NUP ku Uganda a Robert Chagulanyi Sentamu omwe amadziwikanso kuti Bobi Wine atuluka  m'dziko la Uganda. Zifukwa zeni zeni zomwe iwo atulukira mdzikolo sizikudziwika koma a Bobi Wine akhala akunena kuti moyo wawo unali pa chiopsyezo ndi asilikali ankhondo adzikoli chimalizireni chisankho m'mwezi wa January chaka chino. Alfred Dzaoneni yemwe ndi Mtolankhani mzathu kum'mawa kwa Africa akufotokoza zambiri.

Zigao zonse khumi za dziko la Zambia lero zachita chisangalalo cha achinyamata cha Youth Day ndipo chapmutu cha chaka chino chili motere: Dzukani ndi Kuuluka .  Koma chisangalalo chachikulu cha dziko lonse chayendetsedwa ndi President Hakainde Hichilema mu boma la Solwezi ku chigao cha North-western Province.  Daniel Elisha Banda ali ndi nkhani yonse 

Pambuyo pakubedwa kwa mwini wa crossroads hotel ku Lilongwe mdziko la Malawi, tsopano anthu ayamba kumasowa, ena kubedwa kumene, pomwenso ena akumapezeka ataphedwa patapita masiku. Ena akumawaba nkukawagwi-li-li-ra atawamwetsa mankhwala ogonetsa. Jayne Chilimampunga wabwela ndi nkhani yonse.

Mtsogoleri wa dziko la Zambia Hakainde Hichilema, wafotokoza kuti azimai ndi nsanamira zofunikira kwambiri pa zitukuko za dziko.  A Hichilema analankhula mauwa dzulo pa mwambo wokumbukira tsiku la amai pa dziko lonse lapansi limene cha pamutu chake chinali motere: Danga, Chilungamo, Kuchitapo Kanthu, Kwa Amai ndi Atsikana Onse . Daniel Elisha Banda ali ndi nkhani yonse.

Mpungwepungwe wabuka mchipani chotsutsa boma cha Malawi Congress Party--MCP  mdziko la Malawi pomwe kagulu kena kakufuna mtsogoleri wa Chipanichi  Dr Lazarus Chakwera kuti  atule pansi udindo wawo pomwe ena akuti kaguluko kangotumidwa chabe. Mtolankhani mzathu mdziko la Malawi Kondwani Nyamasauka ali ndi nkhani yonse.

 Anthu ambiri mdziko la Malawi apempha bungwe lothana ndi katangale la ACB kuti afufuze za mchitidwe wa katangale ku nthambi ya polisi pamene apolisi akumapempha ndalama kwa anthu kuti achite ntchito yawo.Jayne Chilimampunga wabwela ndi nkhani yonse

 Boma la Zambia lapeza  ndalama zambiri ku ntchito zosiyana siyana kuphatikiza malonda komanso kuchokela ku thandizo la mabungwe akunja zokwana 53 billion kwacha ya dzikolo mchaka cha 2025. Ziyenela Zimba akufotokoza zambiri

Boma la Zimbabwe  lalengeza kuti kugulitsa miyala ya mtengo wa patali kuyimitsidwe kufikila mtsogolo chifukwa chokuti miyala imagulitsidwa osasulidwa zomwe zimapangitsa kuti miyala izigulitsidwa motsika mtengo. John Kassim akulongosola

Bungwe lowona za mafuta mdziko la Malawi la Malawi Energy Regulatory Authority MERA, lakweza mtengo wa gasi ndi 19.65 pelecenti  kuchoka pa K3,740 kufika pa K4,475.00 pa kilogram imodzi ndipo bungweli lati mafuta a galimoto a Petrol ndi diesel saakwera mtengo. George Mhango akufotokoza zambiri.

Kwa nthawi yachiwiri Mtsogoleri wa dziko la Malawi Professor  Arthur Peter  Mutharika wachoka mdzikolo kupita mdziko la South  Africa  komwe chomwe  akukachita sanaulure. Mtolankhani mzathu mdziko la Malawi Kondwani Nyamasauka ali ndi nkhani yonse.

Mayi Mary Chilima mkazi wa yemwe anali wachiwiri kwa President wa dzikolo Dr Saulos Klaus Chilima wayamikila ganizo la mtsogoleri wa dzikolo Professor Arthur Peter Mutharika lokuti pakhalenso kafufuku wina wa ngozi ya ndege yomwe inapha a Chilima ndi anthu ena asanu ndi atatu (8) m' mwezi wa June mchaka cha 2024. George wabwera ndi tsatane tsatane wa nkhaniyi  

Kachilombo ka matenda a Polio type 2 kapezeka mu mzinda wa Lusaka mdziko la Zambia ndipo kachilomboka kakufanana ndi kachilombo kamene kanapezeka m’mayiko a Namibia ndi Angola. Ziyenela Zimba wabwela ndi nkhani yonse

President wa dziko la Zambia Hakainde Hichilema wachotsa ntchito nduna ya za umoyo, a Elijah Muchima ndi nduna ya ntchito za malonda zing'ono-zing'ono, a Elias Mubanga ndipo mkulu yemwe amafalitsa nkhani zaku nyumba ya boma ya President, Clayson Hamasaka, ndi amene walengeza nkhaniyi mu chikalata chake. Daniel Elisha Banda akulongosola zambiri.

Zipani zingapo zotsutsa boma mdziko la Zambia kuphatikizapo chipani cha Forum for Democracy and Development, FDD, ndi mabungwe ena wodziyimira pa okha, akana kutengako mbali ku zokambilana zakuchulukitsa chiwerengero cha aphungu ndi 70. Bungwe lomwe limayendetsa zisankho mdzikolo la  Electoral Commission of Zambia, ECZ, layambitsa ntchito yakufunsila maganizo ya mafumu, atsogoleri aza ndale, amipingo ndi ena Lolemba pa 16 February 2026. Daniel Elisha Banda akusimba.

Anthu ambiri akufuna kuti boma likhazikitse lamulo loti opha nzake naye aziphedwa, ndikuti president azisainira. Izi zadza pamene mchitidwe ophana chisawawa ukunka nuchulukira ku Malawi. Sabata yatha ku Mwanza anthu anapeza mafupa a ana aakazi  awiri wina zaka 10 wina 12 mminda yosiyana, atasowa kwa masiku ambiri. Jayne Chilimampunga wadza ndi nkhaniyi

 Anthu ambiri akufuna kuti boma likhazikitse lamulo loti opha nzake naye aziphedwa, ndikuti president azisainira.Izi zadza pamene mchitidwe ophana chisawawa ukunka nuchulukira ku Malawi. Sabata yatha ku Mwanza anthu anapeza mafupa a ana aakazi  awiri wina zaka 10 wina 12 mminda yosiyana, atasowa kwa masiku ambiri. Jayne Chilimampunga wadza ndi nkhaniyi 

Anthu a ku m’mwela kwa dziko la Mozambique maka maka mchigawo cha Inhambane,  akhuzidwa kwambili ndi namondwe wa Gezani   pamene anthu oposela 17,000 alibe magetsi komanso mabanja 880 akusowelatu pokhala. Bright Sonjela akufotokoza Zambiri

 Boma la dziko la  Malawi lakana kubweleka ndalama zochuluka kwa ochita malonda ndi makampani a mdzikolo chifukwa likufuna kubweza ngongole zomwe lili nazo kale . George Mhango akusimba  

Pakumveka manong'onong'o akuti bungwe lomwe limayendetsa zisankho mdziko la Zambia la Electoral Commission of Zambia, ECZ,  likufuna kusintha mfundo zina za  malamulo oyendetsera zisankho. Nkhaniyi yabweretsa mantha pakati pa zipani zotsutsa boma. Poyamba Daniel Elisha Banda walankhulana ndi mkulu wa bungwe la Anti-Voter Apathy Project, AVAP, wa chigao cha Eastern Province, a Maumba Ngoma.

Boma la Malawi kudzela mu bungwe lowona za chakudya la National Food Reserve Agency NFRA, layambanso kugula chimanga kwa alimi pamene linasiya kugula chimanga masiku apitawo chifukwa chokuti ndalama zogulira zinatha. George Mhango wabwela ndi nkhani yonse .

Unduna wa za umoyo mdziko la Zimbabwe,  wachenjeza kuti matenda a Cholera ayamba kupezeka m’madela ena pomwe anthu pafupi fupi 300 apezeka ndi matendawa. John Kassim akusimba

Bungwe loyendetsa zisankho mdziko la Zambia la Electoral Commission of Zambia, ECZ, lalengeza kuti lidzaonjezera ma Constituency 70 pa chiwerengero cha ma Constituency 156 omwe alipo kale. Chaka chatha president Hakainde Hichilema adasaina Bill 7 kukhala lamulo ndi choilinga chakuti mu nyumba ya malamulo mu dzalowe  aphungu achizimai ,achinyamata ndi anthu olumala. Zambia adzakhala ndi masankho apatatu pa 13 August chaka chino. Daniel Elisha Banda ali ndi nkhani yonse

Mtsogoleri wa dziko la Ghana, John Dramani Mahama wafika  mdziko la Zambia kumene akuyembekezereka kusainilana pansi mapangano angapo ndi President Hakainde Hichilema. Mtsogoleri oyamba wa Ghana Kwame Nkrumah ndi mtsogoleri oyamba wa Zambia  Kenneth Kaunda ndi amene adayambitsa ubale wapakati pa maiko awiriwa.  Daniel Elisha Banda akusimba. 

Prezident wa dziko la South Sudan a Salva Kiir, wachotsa akulu -akulu awiri aboma ladzikolo popeza kuti  kuti  m’mmodzi mwa akulu akulu amene anasankha kuti atsogolere zokambirana zokhudza chisankho, anamwalira kalekale.A  Kiir, analengeza mwezi watha  kuti asankha a Steward Soroba Budia kutsogolera zokambirana za chisankho chimene chikuyembekezeka kuchitika m’dzikolo m’mwezi wa December chaka chino.Mtolankhani Mzathu kummawa kwa Africa Alfred Dzaoneni ali ndi zambiri

Pamene dziko la Zambia likuyembekezela kuzakhala ndi masankho pa 13 August chaka chino, president wa dzikolo Hakainde Hichilema, watsimikiza kuti masankho adzayenda mwa bata  ndi mtendele komanso mwa chilungamo. Ziyenela Zimba wabwela ndi nkhani yonse

 Phungu wa nyumba ya malamulo wa chipani chotsutsa cha PF mdziko la Zambia , a Brian Mundubile,  asakhidwa kukaimila mgwirizano wa zipani zotsutsa boma za Tonse Alliance m’masankho apatatu omwe adzachitika pa 13 August chaka chino. Pa chisankho chomwe chinachitika dzulo a Mundubile adalandila mavoti 129 pamene opikisana nao mkulu wa chipani cha Christian Democratic Party, a Dr. Danny Pule anapata mavoti 34. A Mundubile  akutsogolera gulu la mpatuko la ECL PF.  Daniel Elisha Banda ali ndi nkhani yonse.

 Pulezidenti wa dziko la Uganda Yoweri Museveni,  wapitiriza kunena zoti chisankho cha chaka chino chinayenda bwino ndipo anthu akunja ndi maiko ena asamvere zomwe otsutsa boma akunena kuti iwo anabera chisankho.Amuseveni ananena ku Kampala ku msonkhano omwe dziko la Uganda limakumbukira tsiku lomwe iwo analanda dziko la Uganda ku ulamuliro omwe iwo amati unali wankhaza wa Milton Obote la Liberation Day. Alfred Dzaoneni wadza ndi zambiri.

CHINYANJA: Nduna ya za malonda, mafakitole  ndi ntchito zokopa alendo mdziko la Malawi  a George Partridge akumana ndi akulu akulu a kampani ya Illovo komwe akambilana za mtengo wa shuga komanso kuti shuga asamasowe mdzikolo. George Mhango akutambasula bwino nkhaniyi.

Bungwe lomenyera ufulu wa anthu mdziko la Malawi lotchedwa Malawi First lomwe limatsogoledwa ndi a Bon Kalindo, laloza chala nthambi zina za boma la dzikolo kuphatikizapo nthambi za chilungamo kapena kuti Judiciary  kamba kosowa dongosolo pakayendetsedwe kake kazinthu, izitu zikudzanso pomwe bwalo lamuturutsa mlembi wamkulu wa chipani chotsutsa boma mdzikolo cha Malawi Congress Party a Richard Chimwendo Banda pa Belo posapereka chilichonse oweruza wina ku bwalo lomwelo atamuturutsa kale. Mtolankhani mzathu ku Lilongwe mdziko la Malawi Kondwani Nyamasauka akuikapo mulomo pankhaniyi.

Zipani za mgwirizano zotsutsa boma za mdziko la Zambia za Tonse Alliance zapambana chisankho cha phungu ku dera la Chawama mu mzinda wa Lusaka. Masankhowa achitika dzulo pambuyo pa yemwe kale anali phungu wa deralo, Tasila Lungu,  kuchotsedwa pa mpando ndi nyumba ya malamulo . Ichi ndi  chifukwa chakuti maiyu adakhalitsa miyezi yochuluka kopanda kuonekera mu nyumba ya malamulo kamba kakuti amalira maliro abambo wake Edgar Chagwa Lungu yemwe kale anali mtsogoleri wa dzikola  Zambia. Nkhani yonse ili ndi Daniel Elisha Banda.

Mchitidwe ochitila nkhanza anthu a chi Alubino wayambilanso m’madela ena a mdziko la Malawi ndipo mtsogoleri wa bungwe la APAM la anthu a chi alubino Young  Muhamba, wati akufuna kuti akadandaule za mchitidwewu kwa mtsogoleri wa dzikolo Professor Arthur Peter Mutharika. Jayne Chilimampunga akutambasula bwino nkhaniyi.

Alimi ambiri mdziko la Zambia, akudandaula kuti boma likuchedwa kuwapatsa ndalama zawo pa zokolola zawo zomwe anagulitsa ku bungwe  la boma lowona za chakudya la Food Reserve agency chaka chatha pamene boma linalonjeza kuti liwalipira alimi onse a mdzikolo pofika pa 10 January chaka chino. Ziyenela Zimba wabwela ndi nkhani yons

Akatswili osiyana siyana a mdziko la Malawi, alankhulapo pa za mtsogoleri wa dzikolo professor Arthur Peter Mutharika, kukwanitsa masiku 100 chiyambileni kulamula pambuyo popambana masankho chaka chatha. George Mhango akusimba.

Yemwe kale anali Nduna ya za chuma mdziko la Mozambique Manuel Chang, wapita ku bwalo la Federal mdziko la USA pa kufuna kuti limve pempho lake lofuna kuti atulutsidwe mndende. Bright Sonjera akufotokoza

Pamene ophunzira ayamba kuphunzira mwa ulere mdziko la Malawi,akatswiri pa nkhani za ndale komanso maphunziro ayankhulapo pa kufunika kwa bvoma kuonjezera malo ogonera pa masukulu ena a maphunziro. Jane Chilimampunga

Nduna ya za chuma mdziko la Zambia Situmbeko Musotokwane, yalengeza kuti boma tsapano lidzilola Ochita malonda a za migodi kuti adzipereka misonkho kugwiritsira ndalama ya dziko la China kuphatikiza ya dziko America. Ziyenela Zimba akufotokoza zambiri

Presidenti wa dziko la Malawi, Professor Arthur Peter Mutharika, wasintha nduna zake za boma patangodutsa miyezi itatu iye kukhala mtsogoleri wa dzikolo. Mtolankhani wa Channel Africa George Mhango wafotokoza zambiri.

Ngozi za pa nsewu zikupitilira kukwera mdziko la Malawi, ndipo pali mafunso pa zomwe zikupangitsa izi. Anthu ambiri akutaya miyoyo yawo ndipo ena akubvulala modetsa nkhawa. Mtolankhani wa Channel Africa Jane Chilimampunga, walankhula ndi katswiri pa nkhani zosiyana siyana mdzikolo Bernard Mwanza, yemwe wakhala akuinika mwa chidwi pa nkhaniyi.

Pali manong’o-non’go akuti aphungu achipani chotsutsa boma cha Patriotic Front, PF, mdziko la Zambia amene anavotela Bill 7 akumaopsyezedwa ndi anthu osadziwika bwino kuti adzaphedwa. M’modzi mwa akuluakulu achipanichi, Philip Bobat Phiri wati nkhani ya ziopsyezo ndi yoipa komabe aphungu achipani chake anachita bwino kuvotela Bill 7. Daniel Elisha Banda akusimba.

Nthambi ya thangatani ana ya UNICEF ya m’bungwe la United Nations yati atsikana ochepela zaka 18 zakubadwa  ofika pafupi fupi 1.8 miliyoni amakwatila mdziko la Zambia. Ziyenela Zimba akufotokoza zambiri.

Dziko la Mozambique layimitsa kugula katundu wina kuchokela ku mayiko a kunja yemwe ndi cement, fulawa, mchele, sipageti, madzi a m’mabotolo  ndi ma tayilosi  ndi cholinga chokuti anthu a mdzikolo azigula katundu opangidwa mdziko lomwelo komanso kuti ndalama za kunja zisamasowe mdzikolo. Bright Sonjela akufotokoza 

Mtsogoleri wa dziko la Malawi Professor Arthur Peter Mutharika, wafika ku Malawi pambuyo pokhala mdziko la South Africa kwa ma sabata pafupi fupi awiri komwe anali pa ulendo wa pa okha osati wa boma. George Mhango akufotokoza zambiri

Banki yayikulu pa dziko lonse la pansi yawuza dziko la Malawi kuti libweze ndalama zokwana 700,000 us dollars ku bankiyi  chifukwa chokuti ma khonsolo ena a dzikolo sanagwilitse ntchito ndalamazo momwe zimayenela kugwilira ntchito. George Mhango akusimba.

Bwalo la za malamulo la Constitutional court la dziko la Zambia  lakana kumva pempho la atsogoleri azipani zotsutsa lakuti liimitse Bill 7 yomwe panopa aphungu akukambilanapo mu nyumba ya malamulo .  Pali *nkhawa zakuti ngati Bill imeneyi yakhazikitsidwa ngati lamulo, President adzakhala ndi mphamvu zopyola malire . Daniel Elisha Banda akutambasula nkhaniyi.

President wa dziko la Mozambique Daniel Chapo wasayina migwilizano yoposela 20 ndi dziko la Portugal. Bright Sonjela akusimba.

Chitetezo chinali chokhwimwa maka mmizinda yaikulu ya dziko la Tanzania lero pomwe dzikoli limakumbukira ufulu odzilamulira palokha Independence Day pamenenso atsogoleri adzikoli analimbikitsa lamulo loti anthu omwe sakugwira ntchito zofunikira asatuluke m’nyumba zawo. M’mizinda ya dalasilamu, Dodoma, Iringa ndi ina anthu samayenda ndipo ogulitsa malonda nawo anali mmakomo kuopa kuphwanya zomwe boma ladzikolo linalamula kuti anthu asatuluke. Africa Alfred Dzaoneni akufotokoza zambiri.

Ndende za mdziko la Zimbabwe zatsegulira masiku okuti anthu wamba azilowa mndende kuti awone zomwe zimachitika m’menemo . John Kassim akufotokoza.

Mkulu wa bungwe loona za ma ufulu achibadidwe a anthu la United Nations High Commission for rights, a Vokker Turk,wati dziko la Uganda likuphwanya maufulu a anthu otsutsa boma munyengo ino ya makampeni. Alfred Dzaoneni ali ndi zambiri.

Dziko la Malawi lakhazikitsa ndondomeko yogwilitsa ntchito tindege tating’ono (ma drawns) ku malire a dzikolo ndi mayiko a Tanzania, Zambia ndi Mozambique ndi cholinga chochepetsa mchitidwe olowetsa katundu mdzikolo mwamazembela. George Mhango wabwela ndi nkhani yonse