Zochitika (Chinyanja)

 Boma la Zambia lasayina pangano la za umoyo ndi boma la United States of America  la ndalama zokwana 2.49 biliyoni US dollars ndipo unduna wa za umoyo wati ndalamazi  zithandizila kupititsa patsogolo ntchito za  umoyo mdziko la Zambia. Ziyenela Zimba akutambasula bwino nkhaniyi

Anthu ambiri mdziko la Malawi adzudzula bungwe lowona za mafuta ndi magetsi la Malawi Energy Regulatory Authority (MERA) ndi  bungwe lokhometsa msonkho la Malawi Revenue Authority (MRA)  polekelera ma venda kumagulitsa mafuta agalimoto pa msika osavomelezeka komanso okwera mtengo kwambiri pamene mafuta akusowa m’madera  mdzikolo. Jayne Chilimampunga wabwela ali ndi nkhani yonse.

Madera ambiri a dziko la Zambia akuyembekezeka kulandira mvula yochepa kwambiri komanso zokolola zochepa m’nyengo ya ulimi ya 2026/2027. Ichi ndi chifukwa cha nyengo ya El Nino yomwe idzakhudza madera ambiri adzikolo. Izi zapangitsa akatswiri azanyengo komanso unduna wa za ulimi kupempha alimi kuti alime mbewu zomwe zimacha msanga, pofuna kupewa njala. Daniel Elisha Banda akulongosola.

Boma la Zimbabwe ndi lomwe liyendetse maliro a mponda matiki Wicknell Chivayo ndi mkazi wake Lucy Muteke amene anamwalira pa ngozi ya helicopter ndi anthu ena atatu sabata yatha. John Kassim akufotokoza mwatsatane-tsatane.

Mtsogoleri wa mgwilizano osutsa boma wa Tonse Alliance Pamodzi mdziko la Zambia Brian Mundubile ndi wachiwiri wake Makebi Zulu lero anawonekela ku bwalo la milandu  m’boma la Solowezi ndipo khothi lakana pempho la akulu akuluwa lofuna kupeleka umboni wa pakamwa pa mlandu omwe akuzengedwa ochita zokopa anthu kuti awukile dzikolo. Ziyenela Zimba akufotokoza zonse

Msilikali wina wadziko la Uganda Lefutenanti Matanda Mabonga watulutsa makanema omwe akuonetsa anthu ena omwe amazuzidwa akagwidwa kunyumba zomwe asilikali adzikolo a UPDF anamanga pofuna kulangiramo anthu otsutsa boma zija pachingerezi amati ma safe house kapena torture chambers.Mtolankhani mzathu ku m’mawa kwa Africa Alfred Dzaoneni ali ndi zambiri.

Bungwe loyang’anila za umoyo pa dziko lonse la pansi la WHO, lapempha adindo a boma la Zambia kuti alimbike pa ntchito yothana ndi matenda a Cholera omwe abuka kale mu mzinda wa Lusaka likulu la dzikolo. Ziyenela Zimba ali ndi nkhani yonse.

Bungwe lothana ndi katangale ndi ziphuphu mdziko la Malawi la Anti Corruption Bureau - ACB, lamanga mkulu wakale wa asilikali a nkhondo General Paul Valentino Phiri pomuganizira pa milandu isanu yokhudza kugwiritsa ntchito udindo wake molakwika komanso kugwiritsa ntchito katundu opezeka mu njira zosavomelezeka. George Mhango ali ndi nkhani yonse

Prezidenti wa dziko la Zimbabwe Emmerson Mnangagwa wapeleka uthenga wa chipepeso kwa Mabanja a Mpondamatiki odziwika bwino wa mdzikolo Wicknell Chivayo yemwe wamwalira pangozi ya helikopita pamodzi ndi mkazi wake Lucy Muteke ndi anthu ena anayi. John Kassim akulongosola zambiri.

Mtsogoleri wa dziko la Mozambique Daniel Chapo akucheza mdziko la Botswana komwe akumane ndi mtsogoleri wa dzikolo Duma Boko ndi kulimbikitsa ubale pakati pa mayikowa pa ntchito zosiyana siyana monga ulimi ndi maphunziro. Bright sonjela akulongosola nkhani yonse mwatsatane tsatane.

Mtsogoleri wa dziko la Mozambique  Daniel Chapo watsogolera mwambo okumbukila tsiku lomwe dzikolo linayamba nkhondo yolimbana ndi atsamunda umene wachitika mchigawo cha kum’mwera kwa dzikolo cha Inyambane. Bright Sonjela akufotokoza zambiri

Katswili olankhulapo pa Zochitika mchigawo cha ku m’mawa kwa Africa a  Senior Counsel Wame Pearson, ati zomwe Prezidenti wa dziko la South Sudan  Salva Kiir Mayardit  wachita kuthetsa boma la mgwirizano lomwe limadziwika kuti Revitalised Transitional Government of National Unity  ndi zolakwika pamene dzikoli lichite zisankho zomwe zizachitike pa 22 December  chaka chino. Mtolankhani mzathu ku Alfred Dzaoneni ali ndi zambiri mulipoti ili.

Banki yaikulu ya Reserve mdziko la Malawi, yalengeza kutsitsa mulingo wa ndalama za dziko la America zomwe a Malawi akuyenera kugwiritsa ntchito pa zintchito zosiyanasiyana. Kuti timve zambiri nayi mtolankhani mzathu mdziko la Malawi Kondwani Nyamasauka.

Chiganizo cha dziko la malawi chofuna kupala magetsi kuchokela mdziko la Mozambique chayimitsidwa kaye chifukwa boma likuyenela kupeleka ndalama zokwana 16 .8 million US Dollars ntchitoyi isanayambe ngati chikole zomwe ndi zochuluka  . George Mhango wabwela ndi nkhani yonse

Atsogoleri ena a chipani cholamula boma cha UPND ku Zambia akufuna kuti Nyumba ya Malamulo ichotse malire a nthawi ya utsogoleri wa Prezidenti, omwe malinga ndi malamulo a dzikolo ndi zaka khumi. Malinga ndi malamulo omwe alipo, Purezidenti Hakainde Hichilema akuyenera kumaliza nthawi yake yachiwiri mu chaka cha 2031. Komabe, ngati kusintha kwa lamuloli kungavomerezedwe, Purezidenti Hichilema angakhale ndi mwayi wopikisana pa chisankho china, malinga ngati adzasankhidwenso ndi anthu. Daniel Elisha Banda akulongosola.

Mabungwe asanu ndi awiri a ma loya a mdziko la Zambia ndi ena akunja kwa dzikolo apempha  kuti pakhale kafuku fuku pa momwe masankho a pa 13 august chino anayendela monga kutsekedwa kwa makhothi ndi kumangidwa kwa anthu ena otsutsa boma mwa zina. Ziyenela Zimba akufotokoza tsatane tsatane wa nkhaniyi

Chipani chosutsa boma cha mdziko la Mozambique cha Anamola chomwe mtsogoleri wake ndi Menancio Mondlane chadandaula ndi kuphedwa kwa mamembala ake 57 kuyambila m’mwezi wa August chaka chatha. Bright Sonjela akutambasula bwino nkhaniyi

Boma la Malawi lakhazikitsa mzika digital ID wallet yomwe izisunga chiphatso cha umzika kapena kuti ID pa makina amakono a pa intaneti ndipo tsopano ID siyimapanga expire. George Mhango anali ku mwambo okhazikitsa wallet imeneyi ndipo wabwela ndi zambiri.

Mkulu wasilikali adziko la Uganda a General Muhoozi Kainerugaba watsutsa ganizo loti yemwe ndi nkhala kale pandale komanso mtsogoleri wotsutsa boma wachipani cha People's Front for Freedom-PFF Dr Kizza Besigye komanso loya wake Erias Lukwago alandire belo  popeza akudwala pomwe ali mndende. Mtolankhani mzathu kum’mwa kwa Africa Alfred Dzaoneni ali ndi lipoti ili.  

President Emmerson Mnangagwa wa dziko la Zimbabwe lero wapeleka malo omanga nyumba zoposa 900 ku mashona land central pa tsiku lokumbukira nkhume nkhume zotchedwa Monomutapa pamene tsikuli ndi tchuthi kwa nthawi yoyamba . John Kassim akulongosola zambiri.  

Chuma chomwe dziko la Mozambique limasunga chatsika  kufika pa 3.4 biliyoni US dollars  kuchoka pa  kwa nthawi yoyamba m’miyezi 12  zomwe zikupeleka chiopsyezo kuti ndalama za kunja (forex) zikhala zochepa mdzikolo. Bright Sonjela akufotokoza zambiri. 

Prezidenti Hakainde Hichilema wa dziko la Zambia walumbilitsa nduna zinayi zatsopano za boma lake. M’modzi mwa ndunazi  ndi yemwe kale anali nduna ya za Chuma a Situmbeko  Musokotwane omwe abwezedwanso pa udindowu. Prezidenti Hichilema akupitilizabe  kusankha nduna zina  mu cabinet zomwe zikuyembekezeka kukhala pa chiwelengelo cha 26. Daniel Elisha Banda akulongosola.

Alfred Dzaoneni wacheza ndi dokotala wa zachipatala komanso mtsogoleri wa Uzima Ministries ku Uganda, Dr Martin Rweza, yemwe wati anthu sayenera kuchita manyazi ndi matenda a maganizo, koma ayenera kufunafuna chithandizo mwamsanga ngati mmene amachitira ndi matenda ena. Iyeyu akugwiritsanso makina owunikira ubongo ku Uganda kuti anthu azitha kuzindikira chimene anakhala kuti anthuwa asakhale ndi matenda a ubongo kapena kuti amaganizo ngakhale kunali kovuta kukwanilitsa maloto ake . Umu ndi momwe Alfred anachezera ndi a Rweza.

Makolo ndi anthu ambiri mdziko la Malawi, akhumudwa ndi kuchepa kwa ophunzira amene akhonza mayeso a form 4 chaka chino ofika ku 59 percent pamene ambiri omwe sanachite bwino ndi ophunzila a ku masukulu a ku midzi. Jayne Chilamampunga wadza ndi nkhani yonse.

Maiko mu Africa akuyenera kulimbikira pa kugwira ntchito limodzi pa kufuna kukweza kayendetsedwe ka malonda. Izi, ndi mwa zina zomwe nthumwi zakambilana pa msonkhano wa za malonda otchedwa Embassies Business fair and Conference, omwe wamalizika lero. Msonkhanowu, unakhazikitsidwa ndi ma ofesi a akazembe a m’maiko a mu Africa ndi cholinga chofuna kulumikiza ma businesi kuti adzigwira ntchito limodzi. Thamo Kapisa anali komweko ndipo ali ndi zambiri. 

Mpingo wa chikatolika mdziko la Mozambique wapempha akulu akulu a chitetezo kuti afufuze za kuphedwa kwa bishop Osório Citora Afonso m’mwezi wa June chaka chino . Bright Sonjela akusimba

Mpweya wa gasi ophikira wayamba kusowa ku Malawi  pamene magetsi akuthima thima mdzikolo zomwe zikupangitsa anthu kuti azigwilitsa ntchito Makala omwe amabweletsa vuto la kudula mitengo mwa chisawawa. George Mhango wabwera ndi nkhani yonse

Aphungu a anyumba ya malamulo amene anasankhidwa pa masankho a pa 13 August chaka chino mdziko la Zambia  alumbilitsidwa pamene ayambe ntchito yawo posachedwapa. Ziyenela Zimba wabwela ndi nkhani yonse

Prezidenti wa dziko la Uganda, Yoweri Museveni, wavomereza kuthandiza mwana wake, General Muhoozi Kainerugaba, kuti apikisane nawo pa udindo wa pulezidenti mu chisankho cha 2031. Alfred Dzaoneni wabwera ndi nkhani yonse

Prezidenti wa dziko la Uganda, Yoweri Museveni, wavomereza kuthandiza mwana wake, General Muhoozi Kainerugaba, kuti apikisane nawo pa udindo wa pulezidenti mu chisankho cha 2031. Alfred Dzaoneni wabwera ndi nkhani yonse

katswili omenyela ufulu  wa amayi ndi atsikana mdziko la Malawi mayi Emma Kaliya, alankhulapo pa zomwe achipembedzo cha chisilamu akufuna kuti azibambo omwe akamayezetsa umwini wa ana kapena kuti DNA partenity test, akapezeka kuti anawo ndi ake, adzimangidwa chifukwa chakuti amuika mkazi wawo pa ululu komanso kumunyazitsa pa zinthu zopanda umboni. Jayne Chilimampunga walankhula ndi katswiliyu.

Mtsogoleri wa dziko la Zimbabwe Emmerson Mnangagwa ali mdziko la Mozambique komwe anakhala nawo  pa mwambo okhazikitsa  ndime ya chiwiri ya payipi yonyamula mafuta agalimoto pakati pa mayikowa kuchoka mu mzinda wa Beira kukafika ku Feruka mdziko la Zimbabwe. Bright Sonjela akufotokoza zonse.

Mtsogoleri wa dziko la Zambia Hakainde Hichilema walumbilitsidwa  ku bwalo la masewera la National Heroes mu mzinda wa Lusaka pambuyo pa kupambana masankho a pa 13 August chaka chino ndi pafupi fupi 60 perecenti ya mavoti. Ziyenela Zimba wabwera ndi nkhaniyi

Mzika zina za dziko la Malawi zili zokhuzidwa ndi kuonongeka kwa misewu yambiri mdzikolo yomwe siyimakonzedwa pafupi pafupi chifukwa cha mavuto osiyana siyana. Jayne Chilimampunga akutambasula bwino nkhaniyi. 

Apolisi ku Malawi amanga akulu akulu awiri a bungwe lowona za mafuta  la Nocma pa nkhani yokhuza kubeledwa kwa ndalama zokwana 700 million Kwacha ya bungweli. George Mhango akufotokoza zonse mwatsatane tsatane

Atsogoleri awiri amene anayimira mgwirizano wa zipani zotsutsa boma za Tonse Pamodzi Alliance ndi  chipani cha NRPUP, a Brian Mundubile ndi a Makebi Zulu mdziko la Zambia  pa chisankho cha president cha pa 13 August 2026,aperekedwa m’manja mwa polisi ndi bungwe la United Nations. Kenaka banja la malemu a Mutotwe Kafwaya amene anaphedwa ndi asirikari aboma pa 14 August 2026 ku nyumba ya a Brian Mundubile akana pempho la boma lakuti malemuyi  ayikidwe m’manda ndi ulemu wa boma ngati nduna yakale ya boma. Daniel Elisha Banda akusimba.

Yemwe ndi mkulu wa asilikali adziko la Uganda komanso mwana wa pulezidenti wadzikolo a Muhoozi Kainerugaba walengeza kuti adzayimira ngati pulezidenti wadzikolo muchisankho cha 2031.Iye wananena izi pamakina ake amchezo. Alfred Dzaoneni wadza ndi zambiri.

Anthu ena mdziko la Malawi akufuna kuti mabungwe ndi nthambi zina za boma zikhale zoyima pa zokha kuti boma lisamalowelere pa kagwilidwe ka ntchito zawo pamene ena akufuna kuti bungwe loyendetsa chisankho la MEC likhale loyima pa lokha. Jayne Chilimampunga wabwela ndi nkhani yonse 

Boma la Mozambique lakhwimitsa chitetezo cha mankhwala ndi makatemela ochokela kunja. Bright Sonjela akulongosola zonse

Loya komanso womenyera ufulu wa anthu, a Linda Kasonde, a Brebner Changala ndi bungwe la LCK Freedom Foundation, apereka petition kapeni kuti chikalata ku Constitutional Court mdziko la Zambia, kupempha khotili kuti lilamule kuti pakhale chisankho china cha President, ponena kuti chisankho cha pa 13 August 2026 sichinayende mwa chilungamo pamene chikonzekero chakulumbiritsa President Hakainde Hichilema pa 1 September 2026 chafika pa chimake. Daniel Elisha Banda akulongosola.

Akatswiri omwe amayankhulapo zochitika zosiyana-siyana mdziko la Malawi, ati mzovetsa chisoni kuti adindo alephera kuteteza ndalama zomwe zabedwa ku company yowona za mafuta agalimoto ya NOCMA zokwana K700 million. Kondwani Nyamasauka ali ndi nkhani yonse.

Akatswiri a za malamulo ambiri ku Uganda atsutsana ndi zomwe zachitika ku bwalo lamilandu la likulu ku Uganda pomwe maloya oyimira mulandu nkhalakale pandale a Kizza Besigye ndi anzawo a Obed Lutale anena kuti asiya kuwayimira iwowa pa mulandu wawo.Awiriwa akuyankha mulandu ofuna kulanda boma ladziko la Uganda ku khothi lalikulu ku Kampala.Mtolankhani wa Channel Africa  ku m’mawa kwa Africa Alfred Dzaoneni ali ndi zambiri.

Makhothi onse m’dziko la Zambia atsekedwa ndipo akuyang’aniridwa ndi asilikali, pomwe lero pa 24 August 2026  ndi tsiku lomaliza loti mtsogoleri wa Tonse Pamodzi Alliance, Brian Mundubile, apereke patition kapena kalata yotsutsa zotsatira za chisankho cha pa 13 August 2026. Zimenezi zachititsa kuti mabungwe angapo omenyera ufulu wa anthu atsutse zomwe boma lachita, ponena kuti kutsekedwa kwa makhothi komanso kuyang’aniridwa kwawo ndi asilikali ndikupondereza maufulu a anthu. Mada Phiri wamva zambiri kuchokela kwa Daniel Elisha Banda mtolankhani wa Channel Africa mdziko la Zambia.  

Ntchito yothandiza anamwino 500 a mdziko la Malawi kuti akagwile ntchito ku Israel  chaka chino, yafika ku mapeto pamene mazana mazana anamwino omwe analamaliza maphunzilo awo sakugwila ntchito Ku Malawi. George Mhango wabwela ndi nkhani yonse

Mzika zina za dziko la Zambia  zomwe zikukhala mdziko la South Africa zati masankho omwe anachitika sabata yatha mdzikolo akukhudza tsogolo la mabanja awo, chuma cha dziko, komanso chiyembekezo cha moyo wabwino. Channel Africa yacheza ndi zina mwa nzikazi mu mzinda wa Johannesburg mdziko la South Africa, ndipo Alex Nkhuku ali ndi zambiri.

Apolisi ndi asilikali akupitilira kufufuza anthu amene anasowa pangozi ya boti pa Nyanja ya Kariba mdziko la Zimbabwe lachiwiri sabata yatha pamene chiwelengelo cha anthu omwalira chafika pa 92. John Kassim akulongosola zonse.

Pulezidenti Hakainde Hichilema wayamikira anthu onse a ku Zambia, kuphatikizapo amene anamuvotera komanso amene sanamuvotere, potsindika kuti aliyense ali ndi ufulu wosankha mtsogoleri amene akumufuna.Malinga ndi zotsatira za masankho zomwe zalengezedwa ndi bungwe loyendetsa zisankho la ECZ,a  Hichilema apeza mavoti oposa 2.97 million pamene a Brian Mundubile apeza mavoti oposa 1.86 miliyoni. Nkhani yonse ili ndi Daniel Elisha Banda.

 Bungwe lowona za mayeso mdziko la Malawi la Maneb latulutsa zotsatila za mayeso a standadi  8 ndi fomu 2. Jayne Chilimampunga wabwela ndi nkhaniyi

Polisi ya dziko la Zambia yagwira akuluakulu  khumi ndi m’modzi 11 azipani zotsutsa za mgwirizano wa Tonse Alliance pambuyo pakupezeka ndi zida za nkhondo zoopsya. Mkulu wa zipanizi ndi a Brian Mundubile amene akutengako mbali ku masankho a President. Pakati pa wogwidwawa pali mpongozi wa malemu Edgar Chagwa Lungu, a Patrick Mwansa. Mlembi wa cabinet ya boma. A Patrick Kangwa ndi amene alengeza nkhaniyi ku mtundu wa Zambia. Daniel Elisha Banda ali ndi nkhani yonse.

Bungwe lowona za mayeso mdziko la Malawi la Maneb latulutsa zotsatila za mayeso a standadi  8 ndi fomu 2. Jayne Chilimampunga wabwela ndi nkhaniyi..