Bangwe ba baagi ba re bathati ba puso ga ba dire go lekane go tlhokomela meago ya puso, gore bangwe ba se e dirise mo mererong ya bosenyi. Baagi ba kwa Ekuphakameni gaufi le Carletonville kwa province ya Gauteng, ba re ga ba a babalesega gonne badiri ba moepo ba ba seng mo molao, ba nna mo moagong wa sekolo sa puso. Baagi ba re badiri ba moepo ba ba seng mo molaong, ba simolotse go nna mo moagong oo fa barutwana ba sena go fudusetswa kwa sekolong se sengwe. Ba re go ne go kwadisitswe palo e nnye ya barutwana kwa sekolong seo sa Ekuphakameni. Baagi ba bega fa badiri ba moepo ba ba seng mo molao, ba dirisa sekolo seno jaaka tavern gape e le lefelo la go robala.