SABC Tindzaba

Umholi weFreedom Front Plus Dktl Corne Mulder utsi mibhikisho yekukhonondza ngebantfu bangaphandle lebete timpepha kulelive iyavisiseka. Bekaphendvula imibuto yemalunga enhlangano emkhankasweni welukhetfo eDurbanville eCape Town itolo kusihlwa kwandvulela lukhetfo labohulumende basemakhaya. Mulder utsi bantfu bangaphandle ngete bangene ngenkululeko eminceleni yelive ngephandle kwetimpepha letisemtsetfweni....,

Esigabeni setfu setelukhetfo ngaboLwesitsatfu sibambisene nelikomishana laka-IEC, sibuka kwekutsi ngubani lekumelem avote nekutsi yini longayilindzela nawufika esikhungwnei sekuvota. Sicocisana nalokhulumela iIEC eMpumalanga Thanduxolo Chembeni.

Loyo logacele sikhundla sasodolobha kumasipala wase-Jozi ngepjhansi kwenhlangano i-Rise Mzansi Lukhona Mnguni utsi inhlangano yakhe iyocedza nya kusetjentiswa kwetikhungo tangasese kulomasipala waseJozi ngobe atsi ngito umnyombo walenkinga yekungaphakelwa kahle kwetinsita. Busi Bopela naMillicent Phakathi bayasibikela.

Ichubekile nemkhankaso wayo inhlangano ye-IFP njengobe sekubangwe ekhetfweni lenyanga letako. Umholi weIFP  Velenkosini Hlabisa uvakashele emadolobha nemalokisi lamakhulukati kulesigodzi se-Africa. Ucale lomkhankaso wakhe ngekuyoniketa ngendlu lelungiswe kabusha eMeadowlands wasuka lapho wayokhulumisana netakhamuti taseKliptown aticela kutsi tinikete lenhlangano litfuba lekuhola lomkhandlu wase-Jozi. Ntlantla Kgatlhane naZandile Nkosi bayasibikela

Labo labangenela lukhetfo batimele sebacele bantfu kutsi baphume bayovota ngebunyenti kute kutfutfuke kwetfulwa kwetinsita. Labaholi labatimele batsembisa kutsi kutawuba netingucuko emimangweni yabo ngemuva kwelukhetfo.  Motsebi wa Monareng uyabika.

Bahlali base- Zwelisha dvute naKaBokweni kulesifundza se-Mpumalanga  bakhale batigicita kumholi we-EFF Julius Malema ngetinkinga tekungetfulelwa tinsita. Michael Mdluli uyasibikela 

Umgcini-mafa jikelele weANC Dktl Gwen Ramokgopa utsi bomasipala kufute badlale indzima lenkulu ekuvuleni ematfuba emisebenti. Ramokgopa bekakhuluma nesive saseGa-Ramokgopa ngephasi kwamasipala iMolemole eLimpopo emkhankasweni welukhetfo labohulumende basemakhaya. Ramokgopa utsi bomasipala kufute bavule ematfuba ekucashwa kwebantfu labasha emsebentini....,

Likomishana lelukhetfo i-EC ,lidlala indzima lebaluleke kakhulu ekuciniskeiseni kutsi lukhetfo luba nguloluphephile nalolungavuni nhlangotsi, selisebentisana netinhlangano tetinkundla tekuchumana letifana naboTik Tok kutama kugwema kusatjalaliswa kwemniningwane longasilo liciniso. Zara Groenewald na-Zandile Nkosi bayabika

Umholi we-DA logacele sikhundla sekuba ngusodolobha wemkhandlu wase-Kapa Geordin Hill-Lewis utsi lomlayeto wabo welukhetfo lomusha lofakwe ku billboard unemandla njengobe ucacisa ngelikusasa labohulumeni basekhaya kulelive. Abongwe Kobokana uyenaba

Njengoba tinhlangano tepolitiki letiyochudzelana elukhetfweni tehla tenyuka tisoma bavoti, kanjalo nalabo lebayongenel,a lolukhetfoi batimele baaphumile bancenga bavoti. Namuhla sikhulumisana nalogacele kuba likhansela ku-Ward 21 Kanyamazane, Tebogo Tlou.

Umholi we-UDM Bantu Holomisa sewumemetele, Mandla Peter, njengalotawumela lenhlangano lkumbango wasodolobha  kumasipla weNelson Mandela Bay eMpumalanga Kapa.

 Lisekela lekucala lamengameli wenhlangano ye Umkhonto weSizwe Party Duduzane  Zuma, utsi uyise wakhe longumholi walenhlangano nalowake waba ngumengameli walleive Jacob Zuma sewululeme madvute nje utawuphuma akhankasele lolukhetfo lolutako. Utsi lamaviki lamabili lengcile bekumatima kakhulu kulomndeni kulandzela kuphatseka kweyise. Khalesakhe Mbhense uysibekela...

Mengameli we-ANC Cyril Ramaphosa uvakalise kukhatsateka ngalokwandza kwekubulawa kwabosopolitiki kulelive kanye nalokubulawa kwebantfu ngebunyenti. Uvete loko  eKapa ngalesikhatsi achuba umkhankaso wekucela emavoti njengobe kubangwe elukhetfweni labomasipala mhla titine kulenyanga letako.  Zalene Merrington naMillicent Phakathi bayasiibikela.

Sekusele emalanga lalishumi nesikmbisa kutsi lelive libambe lukhetfo lwabohulumende basekhaya kulomnyaka wa 2026. Masipala weCity of Mbombela ngulomunye wabomasipala lebabukwe ngemehlo labovu tihlangano letahlukene tepolitiki. Simeme labo lebagacelo sikhundla sasodolobha kulomasipala wase-Mbombela kutewuva kutsi yini lebatayentela bahlali bakulomasipala..

Nanobe kubonakala kunekungaboni ngeliso linye kulidlelandzawonye le ANC/SACP/COSATU,  bosolwati betepolitiki batsi loku kusengalungiseka. Ntebo Mokobo na Fortunate Nkambule bayasibikela.

Umholi wenhlangano ye-DA Geordin Hill-Lewis, utsi ayimkhatsati lenkulumo yamabhalane jikelele wenhlangno ye-ANC, Fikile Mbalula.  Itumeleng Kgajane na Katlego Mathebula bayasibikela..

Lokhulumela iDA Karabo Khakhawu uphefumula ngesincumo senkantolo yemtsetfo-sisekelo lesivuna iANC kulandzela sincumo lesakhishwa phambilini yinkantolo yetelukhetfo. 

I ANC itsi ngetulu kwalesincumo senkantolo yemtsetfos-sisekelo lesivumelana nayo kuloludzaba lweIEC, itawuchubeka nekusebentisana nalelikhomishana lelukhetfo njengoba litilungiselela kwetfula lukhetfo lolukhululekile nalolungakhetsi. Simeme lomelele iANC lekulisekela lamabhalane wenhlangano yabomake beANC, Dina Pule, kutophefumula ngalesincumo senkantolo yemtsetfo-sisekelo.

Njengobe lukhetfo labomasipala selusemnyango, tintsatseli, tifundziswa kanye netinhlangano temphakatsi betibutsene eParkwood eJozi kuyobhunga letintfo letibeka engcupheni kukhululeka kwebetindzaba. Luyanda Danca uyasibikela...

Lisekela lamengameli we-ANC Paul Mashatile, utsi bayohlala batehlisa njalo nangaphandle kwekusolwa kwabo ngekutsi bayatikhukhumeta. Balandzeli balomfelandzawonye basole lenhlangano ye-ANC ngekutsi itibona iyinkulu futsi incono kakhulu.  Mashatile utsi usamele kutfola umbiko lophelele kutsi kwentekeni kulenkomfa yeCOSATU ngalesikhatsi sihlalo weANC Gwede Mantashe aphuma ashiya lenkomfa angaketfuli umyaleto walenhlangano yakhe.  Ntebo Mokobo na-Zandile Nkosi bayasibikela

Inkantolo yemtsetfosisekelo itasikhipha kusasa sincumo ngelicala leANC lefuna kufakwe emalungayo lali-181 ku-ballot yelukhetfo labohulumende basemakhaya ngeLweti. iANC iyenkantolo yemtsetfo-sisekelo iphikisa sincumo selikomishana lelukhetfo iIEC sekungemukeli ema-list emalunga eANC abomasipala lebasitfupha. Igcikitsi yalombango kutsi iANC yehluleka kuchafata likinobho lelitsi "Submit as Final" eluhlelweni leIEC lekubhalisa Online. iANC itsi yalandzela tonke tinhlelo tekuphakamisa emalunga kuyelukhetfweni, kantsi iIEC igcizelela kutsi lama-list azange atfunyelwe ngendlela lelindzelwe.

Tindzaba telukhetfo ngaLwesiitsatfu utiletselwa likomishana lelukhetfo i-IEC, Kulesigaba sanamuhla sitawukhulumisana ne-IEC ngemehluko lokhona emkhatsini kwe-Ward Ballot, PR Local Ballot kanye nePR District. Njengenjwayelo simeme lokhulumela likomishana le-IEC eMpumalanga,  Thanduxolo Chembeni.

Njengobe lusondzela lukhetfo lwabohulumende basekhaya takhamuti tase Waterval Boven kulesifundza se Mpumalanga titsi tineletsemba kutsi buholi lobusha lobutawungena kumaspala waseMakhazeni butawucinisenisa kulwa netinkinga lebabukene nato. Intsatseli yetfu Michael Mdluli uyasibikela.

Inhlangano ye ANC Ehlanzeni kulesifundza se Mpumalanga itsi ineletsemba kwekutsi itawubuyela kubobonkhe bomaspala kulesigodzi ngemva kwelukhetfo lwabohulumende basekhaya. Lenhlangano ikhulume nebetindzaba e Mbombela kubuka kabanti kutsi imephi kusayiwa elukhetfweni lwabohulumende basekhaya. Intsatseli yetfu Motsebi Monareng uyasibikela.

Senyukile sibalo sebaholi labangenela lolukhetfo labohulumende basekhaya batimele seifundzeni seNorth West nakucatsaniswa neselukhetfo lolwabanjwa nga-2021. Simthandile Ntobela na-Given Mahlalela bayabika 

Inkantolo yemtsetfosisekelo namuhla beyilalele sikhalo se ANC kulandzela kutsi inkantolo yelukhetfo ivumelane neIEC kutsi iANC yehluleka kuhlangabetana nemmncamlajucu wekubhalisa emakhansela ayo langu 181 kubomaspala labasitfupha. Ummeli we ANC Advocate Daniel Burger uvete kutsi yonkhe imininingwane lebekufanele bayitfumele ka IEC online bayitfumela kunesikhatsi. Sibahle Motha na Dan waka Dlamini bayasibikela..

Sekusele emaviki langephasi kwalamane ngembi kwekutsi lelive libambe lukhetfo lwabohulumende basekhaya. Tinhlangano letincane takulesifundza seMpumalanga setiphume ngetinkhani kuyokhankasela bavoti. Michael Mdluli uyasibikela... 

Umholi wenhlangano yePatriotic Alliance (PA), Gayton Mckenzie utsi lenhlangano ifisa kutfola kusekelwa kakhulu ngumango wesive semakhaladi esifundzeni sase-Nshonalanga Kapa. Andile Mbanjwa uyabika...  

Mengameli we African People's Convention (APC), Themba Godi utsi lenhlangano itawungenela lukhetfo etifundzeni letisikhombisa kuletiyimfica talelive. Ngalesikhatsi akhuluma e Driehoek ngase Mahikeng e North West, kumkhankaso walenhlangano Godi ugcizelele kutsi lenhlangano ifuna kutivuselela e North West. Tebogo Phakedi na Bongani Mondlane basihlanganisele  lombiko.

Mengameli we-ANC kuvelonke Cyril Ramaphosa utsi unelitsemba lekutsi lenhlangano yakhe itawuphuma nesikhuni sivutsa kulomasipala wase-Mangaung kulandzela kungasebenti kahle kwayo elukhetfweni laphambiilini. Abigail Visagie na Zandile Nkosi bayasibikela.

Inhlangano i-Inkatha Freedom Party (IFP) isamukele sincumo selitiko  letasekhaya sekuhocisa luhlelo lekubhalisa bantfu bangaphandle njengebakhoseli. Ntlantla Kgatlhane na Katlego Mathebula basihlanganisele lombiko.

Tilinganiselwa kumashumi lamabili nakunye tinhlangano letitawube tingenele lukhetfo labohulumende basekhaya kulomnyaka losetulu esifundzeni se Free State. Lebohang Motshweneng na-Katlego Mathebula basihlanganisele lombiko

Umholi wenhlangano ye Pan Africanist Congress of Azania Mzwanele Nyontso uvakalise luvo lwakhe ngalemibhikisho legcine inebudlova lekhonondza ngekugcwala kwebantfu labangenamaphepha ekuba kulelive. Busi Bopela na-Fortunate Nkambule basihlanganisele lombiko.

Njengoba lukhetfo lwabohulumende basekhaya selisondzela, tinhlangano letinyenti letincane tingenele kuchudzelana kumasipala lomkhulu we Nelson Mandela Bay Metro. Nandipha Plaatjie usihlanganisele lombiko.

Bahlali base-Malahleni kulesifundza se Mpumalanga bavakalise kukhatsateka ngekwenyuka kwebugebengu nekuyekela kwebafundzi etikolweni. Michael Mdluli usihlanganisele lombiko.

I-Sun Party, Sizwe Ummah Nation ngulelinye yetihlangano letitingenele lukhetfo lwabohulumende basekhaya, lolutawubanjwa mhla titine ku-Lweti. Sikhulumisana nemholi walenhlangano Cassim Mphadi Fakude.

Inhlangano i-Bophuthatswana Civil Movement (BCM) itsi ngetulu kwekutsi inebalandzel labanyenti esifundzeni sase North West kepha itawuphindze iichudzelane elukhetfweni kumasipala wase-Tshwane.  Siphiwe Mkhize na- Fortunate Nkambule bayasibikela.

Bahlali bakumasipala wase-Chief Albert Luthuli, kulesifundza se Mpumalanga isola lomaspala ngekwehluleka kwetfulela bahlali tinsita. Michael Mdluli uyasibikela.

Tiloku tichubeke njalo tinhlangano tepoliitiki nalabatimele ngekusoma bavoti kulolukhetfo leselusemnyango lwabohulumende basekhaya. Inhlangano i- Middleburg and Hendrina Residents Front ngulenye yaleto letichudzelana ngetihlalo kumasipala we- Steve Tshwete. Kuva kutsi yini lenhlangano leyiphatsele bahlali balomasipala, asemukele sihlalo wayo lenhlangano,  Jomo Segage

Mengameli weANC Cyril Ramaphosa ubite emavolontiya kutsi asebente ngekutimisela kukhulisa tibalo tekwesekelwa kwalenhlangano etifundzeni iMpumalanga Kapa kanye naseLimpopo letikhonjwe njengaletinye lakubusa khona iANC.Ramaphosa bekahlangene nemaVolontiya eStutterheim kumasipala wesigodzi iAmahlathi District ekukhankaseleni lukhetfo labohulumende basemakhanya lenyanga letako....,

Sikhulumisana nalenye yetinhlangano temphakatsi letingenele lukhetfo kumasipala waseL>ekwa. Simeme umholi we-Lekwa Community Forum, Delani Thabethe.

Njengaloku sekusele emaviki langaphasi kwalamane kubanjwe lukhetfo lwabohulumende basemakhaya, i IFP imikise umkhankaso wayo e Hostela e Denver e Jozi itolo.Sibahle Motha na Millicent Phakathi bayasibikela.

I SACP esifundzeni se-Limpopo itsi ayikatfokoti ngesincumo selikhomishana lelukhetfo, i IEC mayelana nekubhaliswa kwelilunga leliyomela lenhlangano elukhetfweni le-ward Councillor. Lenhlangano itsi loyo loyimele ku ward 35 kumasipala we Fetakgomo-Tubatse ukhishiwe wayobhaliswa kumasipala wase Tshwane. I SACP ivule licala lenkohlakalo, ifuna Motlepo Nchabeleng abuyele ayoyimela ku Ward 35 e Fetakgomo-Tubatse Municipality. Nsuku Shiluvana na Vusi Shongwe basihlanganisele lombiko.

Licembu i-Labour Party letfule ngalokusemtsetfweni umhlahlandlela walo kumasipala waseNkomazi kulesifundza i-Mpumalanga. Kukhuluma kabanti ngalomhlahlandlela sikhulumisana nemengameli wsikhashana ku-Labour Party, Joseph Mathunjwa.

Inhlangano i-Africa Mayibuye Movement ngulenye yetinhlangano letinsha lebuke kuchudzelana elukhetfweni lwabohulumende basekhaya kumasipala wase-Nkomazi. Simeme lomelele lenhlangano kulomasipala waseNkomazi, Isaac Sithole kutosichazela kutsi baayintjintja njani imphilo yebantfu bakulomasipala.

I-Independent People's Organization (AIPO) ngulenye yetihlangano letingenele lukhetfo lwabohulumende basekhaya, lolubanjwa mhla titine kuLweti. Lenhlangano iyobe ingenele lukhetfo kubomasipala lamabili kulesifundza seMpumalanga. Kuva kabanti ngalenhlangano asemukele umholi wayo, Bishop Amos Masombuka.

Inhlangano iLabour Party of South Africa itsembisa kuphakela manti, kuvulaa ematfuba emsebenti kanye kuphakela tonkhe tinsita kumphakatsi wamasipala we Nkomazi, eMpumalanga.

Mengameli weANC Cyril Ramaphosa utsi ngetulu kwetinsayeya netikhalo letivetwa bahlali, umkhankaso welukhetfo walenhlangano uhamba kahle kakhulu. Utisolile letehlakalo tebugebengu letimayelana  nekudutjulwa kwebantfu ngebuningi letibonakala tibhoke kulelive. Ntebo Mokobo naZandile Nkosi basihlanganisele lombiko

Inhlangano i-Patriotic Alliance yetfule umhlahlandlela welukhetfo e-Mangaung. Abigail Visagie na-Katlego Mathebula basihlanganisele lombiko.

 Inhlangano i-Africa Mayibuye Movement yetfule umhlahlandlela wayo welukhetfo enkundleni yetemidlalo eTembisa kumasipala wase-Ekurhuleni itolo. Kuva kutsi ucuketseni lomhlahlandlela futsi batawucinisekisa njani kutsi letintfo lebatitsembisako tiyenteka nabangavotelwa, simeme lisekela lemengameli weAfrica Mayibuye Movement, Nomsa ka-Mashobane-Sibisi