Eka hungu ra mixo wa namuntlha leri nga katsakanyiwa hi muteki wa mahungu ya hina Mthobisi Mkhaliphi ri vikiwa eka nongonoko wa Tiko A Xi-Etleli hi Muhluri Chavalala, a ri tiyisisa ntirho wa swikambelo swa DNA mayelana na ku tiyisisa vuxaka exikarji ka vatwisiwa ku vava na maxalka aya vomna. Leswi swi khumbha nghozi ya ku banana/tlumbana ka movha wa xibebe na thekisi hi le mahlweni kutani mimovha yi khoma ndzilo. Nghozi yi humelerile eka gondzo ra R40 ekusuhi na Hoedspruit eka xifundzha-nkulu xa Limpopo. Hi laha vanhu va nhlayo ya kwalomu ka 13 va nga hundza emisaveni hi nkarhi lowu a va ya evhengeleni ra ku xavisavisa matsavu na mihandzu eHoedsruit. Vanhu van'wana lava nga vaviseka va tsutsumiseriwile eka swiyenge swa vutshunguri. Swirho swa mindyangu na maxaka ya  vatwisiwa ku vava eka nghozi leyi nga humelela, va kombela ku pfuniwa tani hi leswi nghozi yi nga va tikisela emiehleketweni. Ku katsiwa swirho swa ndyangu wa ka Mashego na Makine xikan'we yin'wana. Va ri xiyimo xa ku tswha ka vatwisiwa ku vava leswi va nga swi vona loko va fika laha nghozi yi nga humelelal kona swa va tikisela na ku va tshikilela swinene. Muvulavuleri wa ndzawulo ya nhlayiseko wa vaaki xikan'we magondzo eka xifundzha-nkulu xa Mpumalanga Moeti Mmusi, u ri va ta tirhisana na titangha ta vona hi mintirho eka xifundzha-nkulu xa Limpopo ku tiyisisa swikambelo swa DNA na ku lulamisela mintirho ya ku heleketa lava nga hi siya etindlwini ta vona ta ku hetelela. U ri nseketelo na ku pfuna, swi ta khumbha na nkwama wa 'Road Accident Funds' (RAF).

Hi ku yisa hungu leri emahlweni, muhaxi eka nongonoko Clifford Maringa u burisanile na muvulavuleri wa ndzawulo ya rihanyu eka xifundzha-nkulu xa Limpopo Neil Shikwambane. Shikwambane u ri va langutela tirhelo ra swikambelo swa DNA namuntlha hi ntirhisano wa ku khumbha na maxaka ya vatwisiwa ku vava. Swikwambane u ri wa swi twisisa leswaku ntirho lowu, a wu nga olovi hikokwalaho ka xiyimo xa nghozi ya ku tshwa ka vatwisiwa ku vava. U ri leswi swi fanele swi khumbha na maxaka lava nga eku nonohweriweni na ku tikeriwa. Hambi swi ri tano, Shikwambane u ri wa tshembha leswaku va ta humelela hi ku tirhisana na tintangha ta vona hi ntirho eka xifundzha-nkulu xa Mpumalanga xikan'we maphorisa. U ri wa swi twisisa leswaku ku kambela na ku tiyisisa vuxaka, swi nga ha teka nkarhi nyana kambe va ta humelala na hi ku tekela enhlokweni maxaka ya vanhu lava nga hi siya na ku vaviseka.