Mbhurisano exikarhi ka muhaxi eka nongonoko wa Tiko A Xi-Etleli Mixo Mashimbye na Philemon Munyai loyi a nga muvulavuleri wa nhlangano wa 'Cross Border Crime Watch-hood' madyambu ya namuntlha, a wu khumbha xiyimo xa vugevenga etindzhawini ta mindzilakani ya tiko ra Afrika Dzonga na Zimbabwe. Hi laha Munyai a nga boxa leswaku vugevenga bya ku yiviwa ka mimovha na nhundzu xikan'we switirhisiwa swa ku hambana ku ya etikweni ra Zimbabwe swi na swita-ndzhaku. U ri swi wisa na 'economy' na ku endla leswaku va tsandzeka ku etlela byi phaha na ku dya byi rhelela. Munyai u kombetela hi tintiho vaaki van'wana va tiko ra Zimbabwe na Malawi xikan'we Mozambique hi vugevenga bya ku hambana. Hambi swi ri tano, u ri va tirha na ku tirhisana na maphorisa na swiyeneg swin'wana naswona va ti yimiserile swinene ku lwisana na vugevenga xikan'we swigevenga tani hi leswi swi va onhelaka na ku onhela tiko ra Afrika Dzonga hi xiyimo xa vugevenga bya le mindzilekanini.