Eka hungu eri nga katsakanyiwa hi muteki wa mahungu ya hina etindzhawini ta Soshanguve ePitori eka xifundzha-nkulu xa Gauteng Xoliswa Makhikhi ri vikiwa eka nongonoko wa Tiko A Xi-Etleli madyambu ya namuntla hi Rhulani Mzamani, a ri tiyisisa mhangu ya ku dlaya laha ku nga hundza emisaveni vanhu va nhlayo ya kwalomu ka mune ku tlhela ku vaviseka van'wana va kwalomu ka nhungu lava nga amukeriwa exibedlhele. Mhangu yi humelerile hikokwalaho ka ntimbo lowu nga va kona eswidakanini swa 'Marry Me' eSoshanguwe. Muvulavuleri wa mapahorisa eka xifundzha-nkulu xa Gauteng Brigadier Brenda Muridili, u ri varindzi (patrollers) lava a va ri eka matirhelo ya vona ya ntolovelo ya ku hlangana, va vonile vavanuna va ntlhanu lava a va ehlekeketelerisa va ya eka vona. Hi laha ku nga va na ntilmbo lowu nga fikelerisa leswaku ku dlayiwa vanhu va mune ku tlhela ku vaviseka van'wana lava nga amukeriwa exibedlhele. Hambi swi ri tano, u ri vulavusisi bya vona byi ya emahlweni naswona a ku si khomiwa munhu ku fikela sweswi.

Hi ku yisa hungu leri emahlweni muhaxi wa nongonoko Mixo Mashimbye u burisanile na Abram Mashishi ku suka eka vurhangeri bya nhlangano wa vaaki wa SANCO eka xifundzha-nkulu xa Gauteng. Hi laha Mashishi a nga boxa leswaku nhlayo ya lava nga hundza emisaveni yi tlakukile hikokwalaho ka mhangu leyi nga humelela e''Marry Me' Informal Settlement eSoshanguve eka xifundzha-nkulu xa Gauteng. Mashishi u yile emahlweni a boxa leswaku vugevenga bya ku hambana bya tikisela naswona byi na swita-ndzhaku eka mhangu leyi nga humelela na tin'wana. U tlhele a kombela vuleteri bya ku tiya ehenhla ka varindzi (patrollers) leswaku va ta tirha na ku tirhana na swigevenga leswi swin'wana swa swona swi nga hloma. Mashishi u ri xiyimo xa nhlayiseko na nsirhelelo, xi khumbha swinene nhlangano wa vona wa SANCO laha vurhangeri byi faneleke ku swi tekela enhlokweni laha ku katsiwa na hi vurindzi bya ku leteriwa.