Eka hungu leri nga katsanyiwa hi muteki wa mahungu ya hina ePolokwane eka xifundzha-nkulu Jostina Masedi ri vikiwa eka nongonoko wa Tiko A Xi-Etleli mixo wa namuntlha Mixo Mashimbye, a ri tiyisisa swisolo na swivilelo swa ndyangu wa ka va mufi Norman Kubayi laha ku katsiwaka na nsati wa yena Elizabeth. Mufi Norman Kubayi, u ta ya heleketiwa endlwini ya yena ya makumu endzhawini ya vaaki eka Molepo ehandle-nyana ka doroba ra Polokwane. Leswi swi va kona endzhaku ka loko a baleseriwile na ku dlayiwa laha ku nga tlhela ku vaviseka vanhu van'wana. Aku ri endzhaku ka magoza ya maspala wa Polokwane ya ku susa vaaki hi nkanu ya marahani endzhawini ya Juju Valley 02 etlhelo ka gondzo ro ya etindzawini ta ka Matlala eka xifundzha-nkulu xa Limpopo. Maphorisa ya ri hi xiyimo xa ntlimbo na ku kokelana exikarhi ka vaaki na maphorisa lawa a ya pfunetiwa hi swirho swa khamphani ya vurindzi xikan'we swirho swa maspala. Mutshami wa xitulu wa vanadaala ra EFF eka xifundzha-nkulu xa Limpopo Lawrance Mapaulo, u sola swinene mhangu leyi hi ku seketelana na nsati wa mufi Normani Kubayi loyi yena ku nga Elizabeth. Va ri hambi leswi ku nga khomiwa murindzi, maendlelo ya muxaka lowu a ya twisiseki na ku va kavanyeta. Hi hala tlhelo muvulavuleri wa maspala wa Polokwane Thipa Selala, u ri va yimile nyana ku susa na ku rhurhisa vanhu endzhawini ya Juju Valley 02, hi ku landzelelela tirhelo ra nawu ehubyeni ya nawu hi xileriso. Hambi swi ri tano, Selala u ri va ti yimiserile matirhelo ya ku enetis ana ku kombisa tindlela.