SABC Iindaba

Umgqatswa we Rise Mzantsi kwisikhundla sikasodolophu kwisixeko sase Rhawutini uLukhona Mnguni, uthi bazakuwaphelisa amaqumrhu aliqela kwesi sixeko kwilinge lokusiphula neengcambu ingxaki yokusilela kokuhanjiswa kweenkonzo zoluntu. UMnguni ukuthethe oku ngethuba lo mbutho uphehlelela isicwangciso sawo solawulo kwisixeko sase Rhawutini izolo, eRosebank. Lo mbutho ukunye neGOOD party osebenzisana nayo ukugaya inkxaso yonyulo, ulumkise abahlali besi sixeko ukuba bangavoteli umgqatswa we DA uHellen Zille. Ingxelo ka Busi Bopela siyilungiseelwe nguYolanda Kambile....

Inkxasomali yamaqela ezopolitiko namaphulo ongenelelo akhokhelwa luluntu zizinto ekugxilwe kuzo, nanjengoko amaqela ezopolitiko amatsha nalawo madala elungiselela unyulo loomasipala oluzayo. Iintatheli zeli ziko losasazo loluntu zincokole nemibutho i South African Mass Movement (SAMMO), African People's Convention (APC) neMOVESA, ngeyona mingeni ejamelene nayo njengoko ilizwe loMzantsi Afrika lilungiselela unyulo lomhla wesine kweyeNkanga. Kwingxelo kaZara Groenewald, nanku u Alice Koko-Matshoba ebalisa ngakumbi...  

Ukanti sizakuthetha nophuma kumbutho i Sibanye ( We Are One) nongenela unyulo phantsi komasipala ombaxa i Nelson Mandela Bay. Emnxebeni sinaye ozigqatsela ukuba ngusodolophu kulomasipala nongumongameli walombutho, u Xola Given Yani

Umbutho wezopolitiko iSibanye "We are One" ngomnye wemibutho ezigqatsela unyulo kumasipala ombaxa iNelson Mandela, eMpuma Koloni. Lo mbutho ufuna inkxaso yabemi besisixeko ngelixa kukho inkxalabo ngokusiwa kweenkonzo ebantwini, kuquka umgangatho weziseko ezingundoqo, neminye imingeni ephathelene nolawulo lwalo masipala. 

Umbutho iPeople's Power ozinze kwingingqi iNelson Mandela Bay eMpuma Koloni, nawo uzigqatsele unyulo loomasipala lwenyanga ezayo, nanjengoko usithi unezicwangciso zokuphucula ukuhanjiswa kweenkonzo ezingundoqo kulo masipala ujamelene neengxaki zokuqhawuka kwamanzi, umbane, neziseko, phakathi kwezinye izinto. 

: Umbutho osekelwe phantsi kweenkalo ezibeka urhulumento olukhokelisa inkolo noshishino phambili, iEconomic Emancipation Forum, ngomnye wemibutho ezakungenela unyulo loomasipala kumaphando angaphaya kwesithandathu kweli. Lombutho uphakathi kwemibutho ejonge ukungena ebhungeni koomasipala abaquka isixeko sase Nelson Mandela, eMpuma Koloni. Ngumbutho ome ngonxantathu oquka iECOFORUM engumbutho wopolitiko, Ecoforum Trade Union of Southern Africa, engumbutho wabasebenzi abakumazwe aku Mazantsi eAfrika, kwakunye nengxowamali iEcoforum Pension, Road Accident & Provident Fund.

Ukanti sizakuthetha nophuma kumbutho iPeople's Power nongenela unyulo phantsi koMasipala oMbaxa iNelson Mandela Bay,eMpuma Koloni. U-Amanda uncokole nophuma kwi People's Power, uSiyanda Mayana... 

Nanjengoko unyulo loorhulumente basekhaya lusemnyango nje, namhlanje sithe masikhe sikuthathe sikuse ku Ward 31, kumasipala ombhaxa iNelson Mandela Bay. Le wadi iquka iMissionvale, iSalt Lake neminye imimandla. U-Amanda Xhala udlene indlebe nogaqele isikhundla sokuba nguceba kule-Ward 31, nophuma kumbutho iDemocratic Movement, uLoyiso Gcume...

Ngoku masive kumbutho iChrist Kingdom Party, ukuba abahlali baseNelson Mandela Bay banokuwuvotela ungenza ntoni ukuguqula imeko kulo masipala. U-Amanda Xhala uchophe nongumgqatswa kwisikhundla sikadolophu, uKenneth Tyika...

Iyaqhuba imibutho yopolitiko ukugaya inkxaso ngelilungiselela unyulo loomasipala oluzayo ngomhla wesine kweyeNkanga kulonyaka. Phakathi kwalemibutho ingenela unyulo ukhona umbutho i All Citizens Party nogayela inkxaso komasipala abaliqela nekuquka kuyo umasipala ombaxa i Nelson Mandela Bay. U-Amanda Xhala uncokole nothethela lo mbutho phantsi kwalo masipala umbaxa, u Buntu Mdyesha....

Ngokwenkokheli yeDA nomgqatswa kwisikhundla sikasodolophu kwisixeko seKapa uGeordin Hill-Lewis, ibhodi entsha enomyalezo wonyulo (election billboard) ngolwasemzini, iqulathe umyalezo onamandla ngekamva lwesigaba soorhulumente basemakhaya kweli loMzantsi Afrika. UHill-Lewis uthi le bhodi intsha yezonyulo izakunika izizathu ezivakalayo zokuba abemi beli babe nethemba ngendlela ezakuba yiyo izixeko needolophu zeli. Ukwayibethelele eyokuba eli qela lizimisele ukugcina isininzi salo kwisixeko seKapa kolu nyulo loomasipala luzayo. UHill Lewis uvakalise oku nangona iziphumo zeziko lophando i-Ipsos zibonisa ukwehla kwenkxaso ye DA ngomyinge wamashumi amane anesithandathu ekhulwini(46%), ukusuka kumyinge wamashumi amathandathu (60%) kunyulo loomasipala lwangaphambili. Olu phando lwenziwe phakathi kwenyanga yeSilimela neyeKhala kulo nyaka, nanjengoko ibalisa intatheli yethu uAbongwe Kobokana...

Siyaqhuba mphulaphuli nokuphathela usasazo olukhethekileyo lwengxoxo-mpikiswano yamaqela ezopolitiko angenela unyulo loomasipala luka-2026, noluzakubanjwa ngomhla wesine kwinyanga ezayo. Namhlanje sijonga umasipala ombaxa wesixeko saseKapa, eNtshona Koloni. Kweziyure zimbini zilandelayo sizakube sibuza kule mibutho: Izakuyitshintsha njani imingeni abahlali besixeko saseKapa abajamelene nayo. Le mingeni iquka ukungalingani komngangatho wosiwo lweenkonzo kuluntu, amaxabiso ombane, awothutho nawendawo zokuqeshisa kwesa sixeko, inkqubo yogutyulo engekho semgangathweni, nolwaphulo-mthetho phakathi kwezinye izinto.

Ukuqhwalela konikezelo lweenkonzo nokungamiliseli izohlwayo ngakwabo bangenzi msebenzi wabo kumasipala i-Enoch Mgijima eMpuma Koloni, kukhokelele ekubeni abo babefudula bengamalungu emibutho yezopolitiko bangenele unyulo njengabagqatswa abazimeleyo. Iinkokheli ezisibhozo ze ANC ne Action SA ziphakathi kwabanye abagqatswa abazazikugqatsa njengooceba abazimeleyo kwidolophu iKomani enonikezelo lweenkonzo oluqhwalelayo, kwaye zinethemba lokuphumelela ukuze zenze utshintsho. IKomani ibesesithatheni kule minyaka igqithileyo ngokufeda ukubonelela uluntu ngamanzi nombane ngenxa yothungelwano lweziseko olugugileyo, nokwakhokelela kwiinyanga eziliqela zoqhankqalazo. Aba bagqatswa bazimeleyo kulo masipala bathi ezi isezingxaki eziphambili kwiiwadi zabo. USidima Mfeuku unengxelo......

Umongameli we-ANC, uCyril Ramaphosa uthi umbutho wakhe uneenjongo zokuphumelela umasipala ombaxa waseKapa kwiNtshona Koloni, uwuthatha kwiDA kolu nyulo loomasipala luzayo. Umongameli Ramaphosa ebekulo masipala umbaxa ngempelaveki kwiphulo lokugayela inkxaso unyulo olubanjwa ngomhla wesine kweyeNkanga. Uliqale iphulo lakhe ngokungena umzi nomzi eAthlone, ze waphela ethetha namalungu alo mbutho eMfuleni. IDA ilawule lo masipala kule minyaka ingamashumi amabini igqithileyo. Ngo 2021 kunyulo loomasipala, iANC yafumana umyinge ongaphezulu kweshumi elinesibhozo ekhulwini kulo masipala, kodwa uRamaphosa uthi umbutho wakhe uzithembile ukuba uzakwenza ngcono uwuphumelele lo masipala umbaxa. UZandiswa Mkancu ubalisa kwingxelo kaZalene Merrington......

 Inkundla yomgaqo-siseko igwebe ngecala le-ANC, nalapho ivumele ukuba abagqatswa balo mbutho abayi-181 nabebekhatyiwe ngaphambili yikomishoni ezimeleyo yezonyulo,  emva kokungeniswa kwamagama abo emva kwexesha ebelisikiwe, ukuba bafakwe kwakho kuluhlu lwabagqatswa. Le nkundla ikwavumele ukwamkelwa kwengxelo efungelweyo efakwe emva kwethuba, ngelithi olu libaziseko lube luncinane, izizathu eziye zafakwa ziyanelisa, kwaye ayikhange idale ukuba kwenzelwe ifeya icala elinye. Esi sigwebo senkundla yomgaqo-siseko, sijika isigqibo senkundla echophela imiba yonyulo neyagweba ngakwicala lekomishoni yonyulo ezimeleyo, i-IEC. Masihlalutye esi sigwebo sijonge iingxoxo ezithe zenziwa kule nkundla, neziphembelele kwesi sigqibo senkundla yomgaqo-siseko. U-Ayabonga Kekana uye wancokola nengcali yezomthetho uAdvocate Jazz Vilakazi, kwakunye nomakhi mkhanyi kwimiba yonyulo, uGqirha Nkosikhulule Nyembezi...

Ikomishoni ezimeleyo yezonyulo, i-IEC, ilandisile ithuba lokufakwa koluhlu lwabagqatswa yimibutho engamashumi amathathu anesibini ekwimeko efanayo ne-ANC, neyaye yavaleleka ngaphandle nayo, nanjengoko kusiyiwa kunyulo loorhulumente basekhaya ngomhla wesine kwinyanga ezayo. Le komishoni ithi esi sigqibo sijoliswe ekuqinisekiseni ukuba yonke imibutho yezopolitiko ifumana impatho efanayo, kulandela isigwebo senkundla yomgaqo-siseko, negwebe ngecala le-ANC. I-IEC ithi le mibutho ingamashumi amathathu anesibini ityumbe abagqatswa abaye bayithobela yonke imigaqo emisiweyo, ze yahlawula nemali edingekayo, kodwa ayalufaka uluhlu lwayo olugqibeleleyo. Le komishoni ibithetha namajelo eendaba eCenturion, kwiphondo iGauteng, izolo. UZara Groenewald usenzela lengxelo. 

I-ANC kwinginqi yaseThekwini ithi izakuluqinisa ukhuseleko lwamavolontyia ayo awenza iphulo lokugaya inkxaso lokungena umzi nomzi. Oku kusemva kokudutyulwa kubulawe umququzeleli we ANC kwaWadi 98 nevolontiya eMgababa kumazantsi aseThekwini kwiphondo laKwaZulu-Natal. Esi sibini sidutyulwe sabulawa ngethuba likwiphulo lokugaya inkxaso, lokungena umzi nomzi. Kuthiwa amavolontiya amathathu onzakele, kwaye akwimeko engaginyisi mathe esibhedlele. Ethetha kwindawo yexhwayelo, umququzeleli weANC eThekwini, uThabani Nyawose uthe lo mbutho uzakudinga ukuluqwalasela ngokutsha ukhuseleko lwawo, ukukhusela amavolontiya. Kusenjalo, kusakhangelwa abarhanelwa. UCelumusa Zulu unengxelo..

Umbutho, i-All Natives of South Africa, i-ANOSA ngamafuphi, wasekwa ngabemi boMzantsi Afrika, abadiniweyo kukwamkela izithembiso ezingafezekiswayo, ukungafikeleli kweenkonzo eluntwini, nobunkokheli obubeka phambili iimfuno zabantu abathile. Lombutho, ungenele unyulo loorhulumente basemakhaya lwenyanga ezayo, ngelithi awuzanga uzokudanisa uluntu ngakumbi, kodwa uza ngelizokubuyisela isidima, uzokuthathisa uxanduva, nokunika ithemba kubantu ekudala belinde iinkonzo. 

Inkundla yomgaqo siseko igwebe ngecala le ANC kumba wabagqatswa abangazange bafakwe kuluhlu labagqatswa kwi IEC. Lo mbutho uye wacel'umngeni kwisigqibo senkundla yezonyulo esaba ngecala le IEC, nebesikhuphela ngaphandle abagqatswa abayi-181 ne ANC ukuba bazigqatsele unyulo koomasipala abathandathu. Le mbambano isukela ekubeni iANC isilele ukucofa iqhosha elithi "Submit as Final" kwinkqubo yeIEC yokufaka abagqatswa ngaphambi kwexesha ebelibekiwe.  UAmanda Xhala ubenodliwano ndlebe nomhlalutyi wezopolitiko, ugqirha Asiphe Mxalisa.

Inkundla yomgaqo-siseko igwebe ngecala le-ANC, nalapho ivumele ukuba abagqatswa balo mbutho abayi-181, nabebekhatyiwe ngaphambili yikomishoni ezimeleyo yezonyulo ukuba bazigqatse kunyulo loorhulumente basekhaya oluza kubanjwa ngomhla wesine kwinyanga ezayo. Le nkundla ikwavumele ukwamkelwa kwengxelo efungelweyo efakwe emva kwethuba, ngelithi olu libaziseko lube luncinane, izizathu eziye zafakwa ziyanelisa, kwaye ayikhange idale ukuba kwenzelwe ifeya icala elinye. Usosiba-jikelele we-ANC, uFikile Mbalula, uye wafikelwa lufefe ngethuba ethetha namajelo eendaba emva kwesi sigwebo, waze waquleka emva koko. UVuyolwethu Mabeqa uza nengxelo esiyiqulunqelwe nguSibahle Motha...  

Nanjengoko unyulo loorhulumente basekhaya lusemnyango, iintatheli, izifundiswa namaqela asekuhlaleni, bebehlangene eParktown eRhawutini, ngelokuxoxa ngezigrogriso ejamelene nayo inkululeko yamajelo eendaba. Umnyhadala obizwa iMedia Freedom Festival, ugxile ekuxhatshazweni kumaqonga onxibelelwano, ukusasazwa kweendaba ezingeyonyani, negalelo lobuchwepheshe bonxibelelwano bale mihla, i-artificial intelligence ngolwasemzini, ekusasazeni iindaba ezibubuxoki. ULuyanda Daca usiqulunqele le ngxelo...

Usekela Mongameli weANC, uPaul Mashatile uthi bazakuhlala bezithobile nangona betyholwa ngempakamo nangokungakhathali. Ebephendula kwisankxwe esenziwa ziinkokeli zeCosatu emva kokuba usihlalo weANC kuzwelonke, uGwede Mantashe, ephume phakathi kwinkongolo kazwelonke yalomfelandawonye. UMantashe akonelisekanga ukuthetha phambi kombutho wamaKomanisi kwakunye neSANCO, esithi oku akuhambisani nezithethe zikanxantathu. Unyanzelise ukuba athethe mgqibeli emva kokunganikwa elothuba waphuma phakathi. Oku kubangele abanye abathunywa batyhole uMantashe neANC ngokuba nempakamo. Kwingxelo ka Ntebo Mokobo, masive nanku uAlice Koko-Matshoba.....

Ikomishoni yonyulo ezimeleyo ithi kuzakufuneka imelane neendleko nje ukuba inkundla yomgaqo siseko igwebe ngecala le ANC kwimbambano ephakathi kwayo nalo mbutho, ngoluhlu lwabagqatswa balo mbutho. I-IEC ithethe namajelo eendaba namhlanje(14 October 2026) kundlunkulu wayo eCenturion, malunga nokuqosheliswa kwenkqubo yokufakwa kwezicelo zokuvota ngokukhethekileyo, neminye imiba ebalulekileyo phambi kokubanjwa konyulo. Kwingxelo kaBusi Bopela, nanku uZizipho Cikozani ebalisa ngakumbi...

Umbutho iChrist Kingdom Party ngumbutho wezopolitiko okhokhelwa nguJoseph Mudau nozigqatsela unyulo loomasipala oluzakubanjwa ngomhla wesine kwinyanga ezayo. Lo mbutho uzigqatsele unyulo koomasipala abambaxa abaquka iTshwane, Ekurhuleni, eRhawutini, kwisixeko saseKapa neNelson Mandela Bay.

Ngomhla wesine kweyeNkanga, abavoti abaselungelweni bazakuthatha inxaxheba kunyulo loomasipala lwalo nyaka. Xa befika kwizikhululo zokuvota, bambi bazakunikwa iimpepha zokuvota ezimbini, ngethuba abanye bezakunikwa ezintathu. Njengenxalenye yamanqaku ethu angonyulo, sibize ikomishoni ezimeleyo yezonyulo ukuba isincede sifunde ngokuba umvoti uzakunikwa ii-ballot papers ezimbini okanye ezintathu xa kutheni? UAmanda Xhala uncokole  nosekela manejala we-IEC eMpuma Koloni, uMasindi Mosehana…

Umbutho i-Economic Liberators Forum South Africa uzigqatsela unyulo koomasipala bamaphondo iGauteng, iNtshona Koloni, uMntla Koloni neLimpopo. Ukuva banzi ngezithembiso zonyulo zalo mbutho, nokuba uzakuqubisana njani nemingeni ejamelene noomasipala kula maphondo, 

Abantu kwakunye noluntu kuqala, lhaa ngamazwi asekele ubunkokheli bomgqatswa ozimeleyo kwa wadi 1, kumasipala wasekhaya iNyandeni phantsi kwesithili sase OR Tambo, eMpuma Koloni. Lomgqatswa uthi ukholelwa ukuba uluntu ludinga iinkonzo ngaphezu kwayo yonke enye into. Ungumgqatswa ozimeleyo phantsi kwesithili esinemingeni equka ukusilela kokuhanjiswa kweenkonzo zoluntu, intswela ngqesho kwakunye nolwaphulo mthetho, kwezinye izinto.

 Ikomishoni ezimeleyo yezonyulo, i-IEC, ithi iya kunyanzeleka ukuba ijongane neendleko ezimandla ukuba inkundla yomgaqo-siseko igweba ngecala le-ANC, nalapho icela umngeni ngokungaqukwa koluhlu lwabagqatswa bayo. I-IEC ibichazela amajelo eendaba kundlunkulu wayo eCenturion kwiphondo iGauteng, ngethuba kuqukunjelwa izicelo zeevoti ezikhethekileyo, kuquka nomgama osele iwuhambile ngaphambi kokubanjwa konyulo loorhulumente basekhaya. UBusi Bopela usenzela lengxelo...

INTRO: Njengokuba uMzantsi Afrika ulungiselela ukubamba unyulo loorhulumente basekhaya ngomhla wesine kweyeNkanga, iimfama kwanabo bangaboni kakuhle bathi abanalwazi ngendlela eyiyo yokusebenzisa uxwebhu lokuvota, eyokubhalisela ukuvota, kwaneyokufumana uncedo lwabavoti kunye nendlela yokuvota ngokuzimeleyo. Bathi bayafuna ukuthatha inxaxheba kwinkqubo yeDemokhrasi kodwa abancedwa ngolwazi kwimeko yabo, ntoleyo ebenza bazive ngathi babekelwa bucala. Sincokole nengqonyela yebhunga labantu abangaboniyo eMzantsi Afrika, uLouis Nzimande, ngalomba. 

INTRO: Inkwenkwe etyholwa ngokuhlaba intombazana eneminyanka emithandathu ubudala, kwisikolo esikwityalike yase Umhlali kumantla eTheku, yakhe yabanjwa ngamapolisa kwiinyanga ezintandathu ezidlulileyo. Oku kuza emva kwezityholo zokuba wafaka isixhobo esingathi sisiqhushumbisi kudederhu lweevenkile eBallito. Amapolisa aKwaZulu-Natal athi le nkwenkwe neneminyaka elishumi elinesithandathu ubudala, izivalele kwigumbi lokufundela nabanye abafundi kwakunye notitshala, ngaphambi ngokuhlaba lentombazana amatyeli aliqela. Iye yanqakulwa ngamapolisa isazama ukubaleka. Intwazana le iye yabalekiselwa esibhedlele ikwimeko emaxongo. USiphosethu Nonganga ubalisa kwingxelo ka Dries Liebenberg. 

INTRO: Umfelandawonye wemibutho yabasebenzi, iCosatu, uqalile izolo ukuvotela isigqeba esiphezulu kwizikhundla zobunkokheli ezintandathu kwinkongolo yawo ebanjelwe eKempton Park. Oku kulandela ukuqala ngombhodamo kwale nkongolo kweyoMsintsi, nethe yarhoxiswa ngenxa yeyantlukwano ngaphakathi embuthweni kunye neengxabano zokufanela izikhundla. Inkqubo yovoto ibilawulwa ngumbutho ozimeleyo wovoto, iElectoral Institute for Sustainable Democracy, i-EISA ngamafuphi. Iziphumo zovoto ngokuba ngoobani na abaza kuba ngamagosa kazwelonke e-Cosatu ziza kubhengezwa namhlanje, nolusuku lokugqibela lwale nkongolo. Ingxelo kaNothando Magudulela iza noZandiswa Mkancu...

Intro: Isebe leMfundo esisiseko lithi liluqinisile ukhuseleko lwalo, ukucutha umngcipheko owoyanyaniswa ngokukopa kwanezinye iingxaki ngethuba leemviwo zematriki. Isebe belichubela iPalamente ngokulungela kwalo ukuvavanya abafundi abenza imatriki abangaphezulu kwamawaka angamakhulu alithoba. UYamkela Mtshiyo unengxelo......

Ukanti ukuqwalasela omnye wabagqatswa abazimeleyo, ozigqatsela unyulo loomasipala phantsi kuka ward 10 kumasipala wasekhaya iDr AB Xuma eNgcobo, kwisithili sase Chris Hani, eMpuma Koloni, sinaye emnxebeni uLupho Dyonase.

UNomakhwezi Mbuzwana ngumgqatswa ozimeleyo ongenela unyulo kumasipala wamakhaya Inxuba Yethemba, phantsi kwesithili seChris Hani, eMpuma Koloni. Lo masipala ujamelene nemingeni eliqela equka ingxaki yezemali, ukungabikho kozinzo kulawulo, kuquka amagosa angena zakhono zokwenza umsebenzi, nto leyo echaphazela ukusiwa kweenkonzo ezisemgangathweni ebantwini.

UMasibulele Hlazo ungenele unyulo loomasipala njengo mgqatswa ozimeleyo kumasipala wasekhaya iSakhisizwe, phantsi komasipala wesithili iChris Hani, kwiphondo iMpuma Koloni. Lo masipala uquka iidolophu iCala neKhowa, kuquka imimandla yeelali neefama. Ngo 2024, lomasipala wabhengezwa njengo kuluhlu loomasipala abangena zinzo kulawulo. Ukwajamelene nemingeni apho abahlali bengazifumani ngokugqibeleleyo iinkonzo ezifana namanzi, neendlela ezisemgangathweni. 

INTRO: Umbutho obizwa 'Amabomvana Revolution Movement', ucela iivoti kuloMasipala wesithili iAmathole.

INTRO: Inkqubo yengxoxo-mpikiswano yemibutho engenela unyulo loomasipala kumasipala wesithili iJoe Gqabi, eMpuma Koloni. 

Umbutho iANC, ubhenele kwinkundla yomgaqosiseko izolo, uyokucel' umngeni kwisigqibo senkundla yezonyulo sokungagungqi kumba wokungafakwa kwabagqatswa abathile kuluhlu lwabagqatswa koomasipala abathandathu ngaphambili konyulo loorhulumente basekhaya ekululindeleke lubanjwe ngomhla wesine kweyeNkanga. Eli qela lithi lizithobele zonke iimfuno zomthetho nezolawulo zokutyunjwa kwabagqatswa ngaphambi komhla wokugqibela we-IEC. Eyona nto iphambili kule mpikiswano kukuba ingaba umthetho wonyulo okanye imimiselo yawo ifuna ukuba amaqela ezopolitiko acofe iqhosha elithi "Submit as Final" kwinkqubo yobuxhakaxhaka ye-IEC ekwi-intanethi. I-IEC ithi le nkqubo iyabakhumbuza abo bayisebenzisayo ngokuphindaphindiweyo ukuba bagqibezele eli nyathelo ngaphambi komhla wokugqibela. Ingxelo kaSibahle Motha iza noZandiswa Mkancu...

I-Hofmeyr Community Development Forum, ngumbutho ozakuzela iimfuno zabahlali kummandla weKaroo, kwidolophu iHofmeyr, kwiphondo iMpuma Koloni, nosebenza phantsi komasipala iEnoch Mgijima. Lombutho, uzigqatsela unyulo loomasipala, koomasipala abaquka iEnoch Mgijima, oneedolophu eziquka iKomani, iHofmeyr, iMolteno, iTarkastad, neSterkstroom. Lo mbutho uthi ungenza ngcono, ukunika abantu iinkonzo ezingundoqo... 

Siyaqhuba nokuncokola nemibutho yezopolitiko, nabagqatswa abazimeleyo, abagayela inkxaso yonyulo, phambi komhla wesine kweyeNkanga. Ngolurhatya sithetha nophuma kumbutho i-The Independents, ongenela unyulo kumasipala wamakhaya iEnoch Mgijima, phantsi kwesithili iChris Hani, eMpuma Koloni. Yiminyaka engapha kwemine lomasipala uphantsi kolawulo lorhulumente kazwelonke, ngokuhambelana nesolotya uSection 139 (7) loMgaqo Siseko, kulandela ukufeda kweenzame zongenelelo lwephondo.

Oyinkokheli yePatriotic Alliance, uGayton Mckenzie uthi umbutho wakhe ufuna ukwandisa inkxaso yawo ingapheleli nje kubantu bebala eNtshona Koloni, phambi konyulo loomasipala. Ebethetha ngethuba kuphehlelwa umqulu wezithembiso zonyulo walo mbutho eMitchell's Plain. Lo mbutho udakance izicwangciso zawo eziphambili zesigaba sorhulumento esizayo. U-Andile Mbanjwa uyabalisa...... 

Amaqela amatsha amancinane ezopolitiko nawoluntu eMpuma Koloni anethemba lokuqhuba kakuhle kumasipala ombaxa iBuffalo City phambi konyulo loomasipala lwenyanga ezayo. Le mibutho inoluvo lokuba izakwenza umahluko omkhulu kwimpilo yabantu balo masipala umbaxa ukhokelwa yi ANC. Ikwathi ibeke phambili ukukhawuleziswa konikezelo lweenkonzo nomasipala ombaxa ongenabuqhophololo. UHlumisa Qabaka unengxelo..... 

Lufikelele esiphelweni utyelelo lukamongameli weANC, uCyril Ramaphosa, oluntsuku-mbini eFreystata kwiphulo lokugayel' inkxaso umbutho wakhe. URamaphosa uvakalise inkxalabo kukuchitheka kwelindle kwiindawo ezininzi zesixeko saseMangaung, ukungathathwa kwenkunkuma kwanokungakhelwa koluntu izindlu. Umongameli uthi kwiintsuku ezimbalwa ezizayo uzakuphinda abuyele kulo mmandla uyakuqwalasela ezi nkxalabo ziphakanyiswe ngabahlali. Oku kuza nanjengoko umbutho iAfrikan Alliance for Social Democrats ubusungula umqulu wezithembiso eMangaung. UZandiswa Mkancu ubalisa kwingxelo yentatheli yethu uAbigail Visagie... 

INTRO: Inkqubo yengxoxo-mpikiswano yemibutho engenela unyulo loomasipala kumasipala ombaxa iBuffalo City, eMpuma Koloni. 

INTRO: Umbutho iAfrican People First ngumbutho wezopolitiko osekwe phantsi kwembono yobuAfrika nembono yokulwela uphuhliso, nobumbano lwama-Afrika. Lo mbutho wasekwa kweyeNkanga ngo2020, KwaMashu kwiphondo iKwaZulu-Natal, ngenjongo yokuzisa utshintsho, ukhuthaza ukubuyela kubunganga belilizwekazi. 

INTRO: Ukanti namhlanje sivala ngombutho iOrganic Humanity Movement, ukuva umqulu wezithembiso zawo.

Eminye yemiba eyaphakanyiswayo ngethuba ikomiti yasepalamente yayityelele umasipala Inxuba Yethemba, eNxuba, phantsi komasipala wesithili iChris Hani, ngumba weenkonzo zamanzi nogutyulo. Kwaye kwaphinda kwavakala ukuba ezinye iinkonzo ziphela zisenziwa ngabahlali nanjengoko umasipala esilela. UAmanda Xhala uncokola nomgqatswa ozimeleyo  kumasipala Inxuba Yethemba, uNomakhwezi Mbuzwana.  

Umbutho iDefend SA Movement uzigqatsela unyulo kumasipala wamakhaya iSenqu, phantsi kwesithili iJoe Gqabi, eMpuma Koloni. Lo masipala uquka iidolophu ezifana neSterkspruit, iLady Grey, nasEkhepini, apho abahlali bejongene nemingeni equka intswelangqesho, indlala, ukusilela kophuhliso neenkonzo ezingundoqo. 

Umbutho wezopolitiko wasekuhlaleni, owasekwa ngabahlali, kuba besithi abahoywanga ngurhulumente, kwaye abazifumani iinkonzo zoluntu, i-Mount Fletcher Community Voice, ngomnye wemibutho ezakungenela unyulo, kumasipala wase eLundini, kwingingqi yase Joe Gqabi, eMpuma Koloni. Amalungu alombutho, akwangabahlali base Tlokweng, athi lo, ngumbutho ozakuba sisisombululo kwiimingeni abajongene nayo kulendawo.