Baagi ba kwa Northern Cape ba ngongorega ka ditirelo tsa boitekanelo. Baagi ba re melemo ya di-Antiretroviral, ARV ya tlhaela kwa maokelong le di-clinic kwa Northern Cape. Go sale gale, go tlhageletse video mo metsweding ya tlhaeletsano le boitapoloso e mo go yone baagi ba kgaolo ya John Taolo Gaetsewe ba tshwenyegang ka maemo a bookelo jwa Kuruman. Baagi ba ngongorega ka go ngodiega ga baoki go ba thusa, fa baagi bangwe ba tlhagelela mo video ba robetse fatshe. Le fa gole jalo, bathati ba lefapha la boitekanelo kwa Northern Cape ba re ga se nnete gore melemo ya di-ARV ya tlhaela kwa province eo. Mokhuduthamaga wa boitekanelo kwa Northern Cape, Maruping Lekwene o ne a etetse bookelo jwa kwa Kuruman morago ga dingongorego tsa baagi.