Bathati ba puso ya province ya Free State ba re ba tlile go dira boikuelo kgatlhanong le katlholo ya moatlhodi wa kgotlhatshekelo e kgolo ya Free State - Johannes Daffue. Moatlhodi o atlhotse gore bathati ba puso ba phatlhalatse kgotla ya masepala wa Ngwathe le gore bathati ba puso ya province ba thape motlhankela yo tla tsamaisang merero ya masepala nakwana, administrator. Baeteledipele ba mokgatlho wa baagi - Afri Forum, ba ne ba tlhatlhela kopo kwa kgotlhatshekelo, ya gore bathati ba puso ya province ba thuse go rarabolola mathata a ka ga go tsamaisiwa ga masepala wa Ngwathe. Moatlhodi Daffue a re maloko a kgotla ya masepala ba reteletswe ke go dira tiro ya bona go ya ka molaotheo, le gore ba reteletswe go somarela ditshwanelo tsa baagi ka fa ba retelelwa ke go neela baagi ditirelo ka tshwanelo.